Shillong, Jylliew 03: U Myntri Rangbah ka jylla Meghalaya, u Conrad K. Sangma, u la kren ha kawei ka prokram kaba iadei bad ka “jingpynkhreh ka jylla halor ka El Niño: ban pynskhem iaka bam ka dih bad ka buit sumar um”. U la ban jur ba ka don ka jingdonkam kaba kyrkieh ban don ka jingiatreilang bad ki kam kiba peit iaka lawei namar ka jingkylla ka suinbneng.
U la iathuh ruh ba ka jylla Meghalaya ka la mad iaka jingduna slap kaba haduh palat 80% ha u bnai Jylliew. Wat la ki jingmaitphang bad ki khubor thoh lypa halor ka suinbneng ki lah ban ai jingkyrmen, pynban ka jingpynkhreh lypa ka dei ban long kaba hakhmat tam.
U Myntri Rangbah u la ong ba ka jingkylla ka suinbneng kam dei shuh ka jingeh kaba dang ap ha ka lawei, hynrei ka long ka jingshisha kaba ngi mad mynta ka kynti. Wat la ki jingmaitphang lane ki jingkhmih lypa ki lah ban kylla, ka jingpynkhreh pat kam lah ban ap shuh.
U la khot ia kane ka jingjia ba ka long ka khim kaba ktah haduh ka jingim. U la kyntu ba ki tnat sorkar, ki shnong ki thaw, bad ki kynhun bapher bapher ki dei ban iatreilang ryngkat ka jingtrei kaba kham sngur bad kaba kham ryntih ban pynduna iaki jingsniew kiba lah ban mih.
U la pynbor bad kyntu iaki ophisar ban bud iaka rukom treikam kaba suk ban pynbeit lane pynkylla, kaba shong ryntih halor ki thup jingkhein bad ki jingshisha kiba long ha ki thain nongkyndong lane ki thain ba hap hapoh ka jingpeit.
Ka por ba donkam ka long mynta, u la ban jur ba ym lah ban ap haduh ban da ioh iaki plan kiba bit ba biang hynrei ki dei ban sdang trei kam noh naduh mynta. Man ka sienjam ba ngi shim mynta ka sngi kan pynskhem bad kan pynlong iaka lawei jong ki longdien kaba ieng skhem bad kaba lah ban iaid shakhmat wat hapdeng ki jingsniew ka suinbneng.
U la kren ruh halor ka jingpynneh pynsan iaka rukom rep tynrai. U la kdew ba ki sienjam ba ka jylla ka la shim, kila ioh iaka jingithuh ha ka rynsan bah ka ri, kynthup iaka jingiaroh na u Myntri Rangbahduh ba don burom.
“Ka rukom rep tynrai ka pyni ia ngi iaka lynti kaba iaineh bad kaba lah ban pyntreikam ban pynduna iaka jingshah ktah na ka jingkylla ka suinbneng. Pynban, ngi dei ban pynkylla bad pynbit iaki rukom treikam kiba iadei bad ki rukom long ka suinbneng bad ka khyndew kaba kyrpang jong ka Meghalaya,” u la bynrap.
U la pynrem bad pynshai ruh halor ka jingdonkam ban pyniasoh lang iaki bun rukom ki buit treikam, kynthup iaka jingpynneh pynsan iaki tyllong um, ka jingpynim pat iaki umpohliew bad ka jingshna iaki jaka kynshew um kiba lah ban bat iaka um kum ki check dam bad ki reservoir.
Kane ka prokram kala pyniasoh lang iaki ophisar sorkar rangbah, ki Deputy Commissioner, ki riew shemphang ka rep ka riang, bad ki kynhun ba donkam ba don kti ban pyrkhat jylliew halor ki buit ban pynkhlain iaka jingpynkhreh ka jylla pyrshah iaka El Niño bad ban pynshisha iaka jingshngain ka bam ka dih bad ka um ka dih na ka bynta ka por kaba slem.
