Shillong, Naitung, 06: Ka Central Bureau of Investigation (CBI) kala ioh kem ia u Project Director ka National Highways Authority of India (NHAI), Shillong bad kiwei pat ki ar ngut ki riew shimet ha ka kam bam sap.
Ka CBI ka la dep registar ia katei ka mukotduma ha ka 01 tarik, Naitung, 2026 pyrshah ia une u nongtrei jong ka NHAI, Shillong bad uwei pat u riew shimet bad kiwei ha kaba iadei bad katei ka jingujor.
La kynnoh ba utei u Project Director ka NHAI u la dawa pisa haduh T. 12 lak na u nongujor ban pyllut ha kaba pynbeit ia ka bill ba dang sah kaba poi T. 13.38 klur.
Utei u project director u la hukum ia u nongujor ba un ai shwa shi bynta jong kane ka pisa ba u dawa kaba poi haduh T. 4 Lak. Hadien katei, u la ong ia u ba un ai katei ka pisa sha uwei u riew shimet ha Guwahati.
Utei u riew shimet pat u la ong ba ia katei ka pisa, la ai kylla pat ha uwei u briew bym ithuh ha Guwahati.
Namar katei, ka CBI ka la pynap shrip bad kila kem pyllein pyllein ia utei u riew shimet katba u dang dawa pisa bad shim iaka pisa ba kot haduh T. 4 Lak na u nongujor.
La ong ruh ba ia u Project Director uba la shah kynnoh bad baroh ar ngut kiwei ki riew shimet, kila shah kem bad dang pynlong iaka jingkhynra ha ka jaka sah jong ki bad ka jing tohkit ka dang iai bteng.
