Shillong, Naitung 23: U Myntri Rangbah ka Jylla Shri Conrad K Sangma mynta ka sngi ula sam ia ki sanction letter hapoh ka Chief Minister’s Special Development Fund (CMSDF) ha ka jingialang kaba la pynlong ha Iingsah jong u ha Shillong.
Ia kane ka jingkyrshan pisa la ai sha ki kynhun treikam bapher bapher ha ki shnong ki thaw, ki jaka pule, ki kynhun ialehkai bad ki dorbar shnong ba kin pyntrei ia ki project kiba thmu ban pynkhlain ia ki jingdon ki jingtei ha ki shnong ki thaw bad pynjanai ia ka jingshakri paidbah ha kylleng ka Jylla.
Napdeng kiba ioh bynta ki dei ka Synjuk Rangbah Shnong Dorbar Raid Mathan, Chibak Agalgittim Sports & Cultural Club, Laitnongrim Upper Primary School, Church of God (M&A), Sohryngkham, Rangthong Cultural Club and Sports Association, Reach Shillong Ministries, Mizo Women Welfare Society, Umpling Presbyterian Secondary School, St. Anthony’s Higher Secondary School, bad ki nongmihkhmat na ki shnong jong ki districts bapher bapher.
Ki kam bala bei tyngka ki kynthup ia ka jingtei ia ki Iingskul bad ki kamra pynlong klas, ki Iingdorbar Shnong, ki hall ba lah pyndonkam ia bun ki jait kam, ka jingtei ia ki Ophis jong ki seng ba don ha Shnong, ka jingpynbiang ia ki jaka leit bar ha ki skul bad ki ophis paidbah, ki madan ialehkai basketball, ki jaka saitjain, ki kor um, ka jingshakri ki ambulance, ka jingthied ia ki tiar ialehkai, bad kiwei kiwei ki jingtei hapoh ka Shnong ka thaw.
Haba kren ha ka jingialang, u Myntri Rangbah ula ong ba ka CMSDF ka dang iai bteng ban shakri kum ka atiar ba kongsan na ka bynta ban leh eiei ia ka jingdonkam kyrkieh ia ka roi ka par ha ki shnong ki thaw. Ula pynpaw ba kane ka prokram kala pynlah ha kaban ai jingkyrshan ha ka por kaba biang ia ki project kiba kyntiew ia ka rukom im jong ki nongshong shnong haba iaid ryngkat bad ki prokram ba kham heh jong ka Sorkar.
U Conrad ula ban jur ba ka Sorkar ka iai kut jingmut ban pynthikna ia ka jingai mar katjuh ia ka roi ka par ha baroh ki District da kaba kyrshan ia ki jingdonkam bala ithuh hakhmat eh da ki shnong ki thaw. Ula kyntu ia ki nongioh bynta bad ki nongpyntrei, ba kin pynthikna ba dei ban pyntreikam bha ia kine ki project bala mang bad ban pyndep hapoh ka por kaba la buh khnang ba ki shnong ki thaw kin ioh ia ka jingmyntoi kaba bun eh.
Ha kane ka jingialang la wan iashimbynta da ki nongioh bynta ia ka skhim, ki nongmihkhmat paidbah, ki nongialam shnong bad ki heh Ophisar na ki tnad ba dei khmih.
Ki nongioh bynta kila pynpaw ia ka jingsngewnguh ia ka Sorkar namar ka jingai jingkyrshan ia ki kam kiba pynkhlain ia ki bor shnong, kyntiew ia ka pule dangle bad ki kam ialehkai, pynbha ia ki jingtei ba donkam u paidbah bad synniang sha ka roi ka par jong ka Jylla ha baroh ki liang.
