Shillong, Naitung 23: Mynta ka sngi ka seng Hynniewtrep Youth Council kala pynlong ia ka jingialang paidbah ha Khyndailad ban pynpaw ia ka jingpyrshah ia ka jinglait tuh ki jingkylli eksam National Eligibility-cum-Entrance Test (NEET) kaba la ktah ia ki samla pule, ha kane ka sngi da ki spah ngut ki briew kila ia wan ban ia shim bynta na baroh ki jaidbynriew ban pynpaw ia ka jingpyrshah.
Haba kren ha kane ka jingialang u President ka seng u bah Roykupar Synrem u la ong ba ka jinglaittuh ki jingkylli ka eksam NEET kam ktah tang ia ki samla pule ka ri thor hynrei ka ktah ruh ia ki samla pule ka jylla Meghalaya, kane ka jingialang paidbah ka long ban pynpaw ia ka jingsngew pyrshah ia kane ka sorkar kaba la ialam da u myntri rangbah duh jong ka Ri India u Narendra Modi.
La ong ba kane ka jingiakhih jong ki mynta ka sngi da kaba pynlong ia kane ka jingialang paidbah ka long ruh ban ai ka jingkyrshan ia ki samla pule kiba dang bteng ia ka jingiakhih mynta ha nongbah Delhi bad ka jingiakhih ka jong ki kim long marwei ki ruh ki don lang ban ai mynsiem.
La ong ba kum ki paidbah dei ban sngewthuh ba lada don ka jingkylla ha kaba ia dei bad ka pule puthi kaba ka sorkar pdeng kan sa wanrah kane kan ktah ia baroh kawei ka Ri India, namar kata ka jingpynkylla kan ktah ia baroh kawei ka ri India.
Ha kane ka jingialang la kren ruh da ki samla kiba wan ia shim bynta ha kane ka jingialang kawei na ki nongkren kala ong ba kala dei ka por ban weng ia kane ka sorkar u Narendra Modi, kiwei ki nongkren ki kynthup na kiwei kiwei ki seng bhalang kiba la wan ban ia shim bynta.
