Shillong, Naitung 31: Mynta ka sngi jingialang jong ka Business Advisory Committee (BAC) jong ka iing dorbar thawain ka jylla kala pdiang iaka kalendar na ka bynta ki sngi shong dorbar synrai, kaban sa sdang ha ka 24 haduh ka 28 tarik, Nailar 2026.
U Lamphang ka iing dorbar thawain ka jylla, u Thomas A. Sangma, u la ong ba ka BAC kala pdiang ia katei ka kalendar bad ha katei ka jingialang, la don lang u symbud Myntri ba dei peit iaka tnad Parliamentary Affair u bah Prestone Tynsong, nongialam jong ka liang pyrshah, Dr. Mukul M. Sangma, u bah Charles Pyngrope, Secretary jong ka iing dorbar thawain, u Malthus S Sangma bad kiwei kiwei.
U Lamphang u la ong ba kane ka jingshong dorbar kaba san sngi, lai sngi la mang ia ki kam jong ka sorkar bad ar sngi la mang na ka bynta ki liang pyrshah ha kine ki san sngi kin ioh ban ia kren ia ki kam kiba ia dei bad ka jylla.
Ha ka sngi sdang ka 24/8/2026 ka dei ka sngi bala buh na ka bynta kikam jong ka sorkar ha kaba ka sorkar kan wanrah ia ki bills, ki kaiphot bad kiwei kiwei kiba ia dei bad ka sorkar, kiwei ki sngi kiba la mang ma ka bynta ki kam ka sorkar ka dei ka 26 bad 28/8/2026.
Katba ka 25 bad 27/ 8/2026 ha kine ki ar sngi la mang na ka bynta ki liang pyrshah ha kaba ki lah ban wan rah ia ki bill lada ki don bad kiwei kiwei ki mat ia kren hapoh ka iing dorbar ha kane ka dorbar synrai.
Ia kane ka kalendar kaba la pdiang da ka BAC mynta ka sngi yn rah hapoh ka iing dorbar ban ioh ia ka jingmynjur jong ka iing haba ia dei bad kine ki sngi shong dorkar synrai kiban long san sngi lynter.
