Shillong, Risaw 15: u Executive Member u bah Seiborlang Warbah haba jubab ia ka jingkylli bala buh da u bah Equator Nongrang u la ong ba na ka liang jong ka EC kala mang pisa ha u ne u snem mang tyngka 2026-27 ban maramot bad pynkhuid ia ka MDC Hostel.
Haba jubab ia ka jingkylli bynrap la iathuh ba la mang pisa T.10/- lak tyngka bad da kane ki khmih lynti ba yn sa lah ban kham pynbha ia ka MDC Hostel bad ban lah ban pynkhuid ia ki sawdong sawkun jong ka na kaba ka long mynta.
Haba iadei bad kane u Chief Executive Member u bah Winston Tony Lyngdoh haba jubab ia kane kajuh ka jingkylli u la iathuh ba na ka Sixteen Finance Commission la mang pisa shi klur tyngka bad na kane ka jingmang pisa yn bhah lang ruh ban maramot ia ka MDC Hostel.
Ha kawei pat ka jingkylli bala wanrah da u bah L.Kharbani u EM bah Seiborlang Warbah u la ong ba kila ioh lut ia ka pisa jong ka Fifteen Finance Commission na ka sorkar jylla bad mynta ki dang ialeh ban siew dep noh sha ki kontraktor kiba la pyndep ia ki jingtrei.
