Nongstoin, Risaw, 15: Mynta ka sngi, u Myntri Rangbah ka jylla Meghalaya, u Conrad K. Sangma u la dep plie iaka iing ba dang dep shna jong ka Synod College, Nongstoin ha ka jingdon lang jong u Myntri ka sorkar, u bah Methodius Dkhar, u MLA, u bah Gabriel Wahlang bad u MLA, u R.G. Momin.
Ka pule puthi bad ka dei ka bynta ba kongsan na ka bynta kano kano kano ka imlang ka sahlang ba kan nang kiew shaphrang, u Myntri Rangbah u la ong ba ka sorkar kala trei shitom ha kine ki 8 snem ba la dep ba kan pyrkhat janai biang, mutdur biang bad pynwan dur biang ia baroh ka jinglong jingman ka pule puthi ha ka jylla naduh ki klas rit haduh ki klas heh. U la dep plie pyrda ruh kumjuh iaka library jong ka kolej bad ki kamra skul.
Iaka polisi jong ka pule puthi ka jylla, la dep pynwan dur da ki riewstad ba la tbit kiba la iarap lang iaka sorkar ban shem iaka tyllong jong ka jingeh, ym tang ba ki peit iaki resol jong kiba wan shakhmat ha ka eksam SSLC kum kata ka jingeh, hynrei ki sngewthuh ruh iaka kum kata ka mat ba dei ban pynbeit iaki jingeh. U la iathuh ba ka jylla Meghalaya mynshuwa ka don 14,000 tylli ki skul kaba ia mynta, kila don haduh 11,500 tylli ki skul.
Haba u la kren shaphang ki samla pule kiba thrang ban leit sha ki klas heh, u Conrad u la ong ba ka sorkar kan sa pyn urlong ia kata. U la ong ba hashuwa jong u snem 2018, la don 10 tylli ki skul bah sorkar ba dei jong ka teknikal bad ki kolej.
Ha ki 8 snem ba la dep, la nang kiew kine ki skul bah ba kynthup iaka Shillong Engineering College, Captain Williamson Sangma University, College of Architecture and Urban Planning, Shillong Medical College, Science & Commerce Colleges ha Mahendraganj, Mawphlang, Sohra bad kiwei kiwei.
U Conrad u la iathuh ba ka pule puthi ka ioh iaka bhah pisa kaba haduh T 3,500 klur na ka T. 30,000 klur ka mang tyngka man ka snem.
U la shim ruh iaka lad ban pyntip ba iaki scholarship ba la dep pyllait ha ka shi snem kala kot sha ka T. 400 klur: T. 100 klur hashuwa ka Khristmas 2025, T. 100 klur ha ka 27 tarik Nailar bad T. 104 klur kaba la dep pyllait ha ka 13 tarik Risaw, 2026. U la kular iaka kynhun synshar ba ka sorkar kan iatreilang ryngkat bad ka Synod College, Nongstoin.
U la ai jingiaroh ia u Rev. S.S. Majaw bad iaka iingmane Presbyterian na ka bynta ka jingnoh synniang jong ka sha ka pule puthi bad ong ba um ju kyntait iaki namar ba ka kam jong ki ka long ka bakhraw na ka bynta ka imlang ka sahlang.
Katba ka iing skul thymmai ba dang dep tei jong ka Synod College, Nongstoin, la khmih lynti ba kan pynbiang iaka jaka kaba donkam bha bad ki jingtei kiba bha na ka bynta jong ki samla pule ka thain West Khasi Hills.
