Pynmih hukum ka DC ka EKH District ban khang ki skul phra sngi lynter ha ki 6 tylli ki Block

Shillong, Iaiong 30: ka Deputy Commissioner jong ka East Khasi Hills District ka kong Isawanda Laloo kala pynmih ia ka jingpynbna ba ki skul kiba hap happoh jong ki hynriew tylli ki Block kin khang naduh la shai ka sngi 01^st haduh 08^th Jymmang 2021.

Ki skul kiba la bthah ban khang ki long kito kiba hap hapoh jong ka Mylliem C&RD Block,  Mawlai C&RD Block,  Mawpat C&RD Block,  Mawkynrew C&RD Block,  Mawryngkneng C&RD Block bad Mawphlang Block C&RD Block namar kine baroh ki ia jan bad ka sor Shillong.

Ka jingkhang ia ki skul ha kine ki hynriew tylli ki block ka long namar ka jingkiew sted kane ka jingpang COVID-19 kaba la ktah ia ki tynmen bad ki khynnah bad la bun wat ha ki shnong kyndong ruh la lap ba kila don kiba ioh ia kane ka jingpang COVID-19.

Ban khanglad ia ka jingsaphriang kane ka jingpang ka Deputy Commissioner jong ka East Khasi Hills District kala bthah ba baroh ki skul kiba hap hapoh kitei ki 6 tylli ki block kin khang naduh 01^st haduh ka 08^th Jymmang 2021.