Shillong, Jymmang 02: Ka Hynniewtrep Youth Council (HYC) Central Executive Council mynta ka sngi ka 2 tarik u Jymmang 2024 ka la pynpaw ia ka jingsngew thamula halor ka jingkren u symbut Myntri Rangbah u bah Prestone Tynsong u ba dei ruh u Chairman jong ka High level Committee kaba la peitbniah ia ki sienjam ki ba iadei bad ka jingpynkynriah ia ki briew ki ba shong basah ha themiew Mawlong ha kaba u la phah ban pyn shisha ia ka RTI ka ba la ioh da ka seng HYC na ka office jong ka Shillong Municipal Board.
Ha ba iakren bad ki nongthoh khubor na ka liang u President ka HYC u bah Roykupar Synrem u la ong ba na ka liang ka HYC ka pynpaw ba kat kum ka jubab RTI lashem ba ki don 194 ki longiing ki bat rei bad ka sorkar Jylla hynrei kiba tam nangta kata 148 tylli ki longiing ki dei ki bas hu shong shusah beain ha them Iew Mawlong bad iakane ka jinglap ki la leit ban iakren bad u bah Prestone Tynsong u ban ang tharai ba baroh 342 tylli ki longiing kidei ki batrei ha ki tnad bapher bapher jong ka sorkar Jylla.
U bah Synrem u la ong ruh ba la 6tylli ki snem ka sorkar Jylla ka la iaiid ka jingiakren bad ka HPC bad ka 7 tarik mynta u bnai Jymmang kan dei ka sien khatduh ba ka sorkar kan iakren bad ka HPC hynrei ka ba sngew lyngngoh ka long ba ka sorkar kan hap ban phah pat ha ka ban peit bniah sa shisien pat ia ki kot ki sla. U la ong ruh ba ka jingpynpaw u symbut Myntri Rangbah ba ka jingai jubab RTI teng teng ka lah ban don ka jingbakla hynrei ka RTI ka ba ki ioh kam dei ka ba ki shuthaw hynrei ki ioh napoh ka SMB.
U bah Synrem u la ong ruh ba ka long kaba sngew thamula ba ia ka RTI ka ba ki la ioh napoh ka Office Trei kam jong ka SMB ba na ka liang ka Sorkar kan phah ban peit bniah pat ha kane ka juh ka department. U la ong ruh ba kane ka long tangkum ka lad jingpynslem ha ka ban pynkynriah ia kine ki briew na them iewMawlong.
Kum ban shukdew ba ha ka janmiet jong ka 1 tarik u Jymmang 2024 u bah Prestone u la jubab ia ka jingia kynduh bad ka seng HYC ha ka 29 u Iaiong 2024 ha ka ba ka seng Hyc ka la pynpaw ba kidon tang kumba 194 ki long iing ki ba dei hok ban shah pynkynriah na them Iew Mawlong ym baroh 342 ki long iing kumba la juhkren barabor. U bah Tynsong u la ong ba u la phah ia baroh ki jubab sha ka Office jong ka SMB bad Urban Affairs ba kin pynshisha ia kine ki briew.
