Shillong, Iaiong 18: Mynta ka sngi ka party UDP kala phah ban thep kyrteng ia u bah Synshar Kupar Roy Lyngdoh Thabah ban ia khun ia ka elekshon MLA na Sohiong Assembly Konstitwensi ha dien ka jingkhlad noh jong u bah HDR Lyngdoh kyrtong ka party.
Ha kane ka sngi da ki spah ngut ki nongkyrshan jong ka party UDP kila wan ban synran lang ia u kyrtong ha kane ka jingwan thep kyrteng na ka bynta ka Election MLA ka ban long ha ka 10 Jymmang 2023 hapoh katei ka konstitwensi.
Na ka daw jong ka jingkhlad noh u kyrtong ka party u bah HDR Lyngdoh ha pdeng ka elekshon, ka ECI kala hp ban pynsangeh ia ka jingthep vote ha katei ka konstitwensi, dei halor kane ba ki kyrtong kiba la dep ban thep kila neh bad la shah tang ia ka UDP ban thep kyrteng.
U bah Synshar haba kren sha ki lad pathai khubor, ula ong ba u ieng ban iakhun ia kane ka ilekshon ha ka nongrim jong u bah HDR Lyngdoh (Bam Kwai Dwar U Blei) bad dei namar kane u don ka jingkyrmen ba ki paidbah ka thain Sohiong ruh kin ai ka jingkyrshan bad ka jingjop don burom ha kane ka ilekshon ban wan.
“Ngam kwah ban kren eiei halor ki kam jong u MLA barim ka Sohiong konstitwensi hynrei ngan iai buddien ia ki kam ba u bah HDR Lyngdoh ula prat lynti bad nga kyrmen ba ki paidbah kin ai ka jingjop ia nga ha kane ka ilekshon ban wan namar baroh ki tip ba ka lah dei ka por ban jied ia u nongthaw ain u ban kren iaki mat ba ktah iaki paidbah bad iaka jylla hapoh ka ing dorbar” la ong u bah Synshar.
U bah Synshar ula ong ba kum u rangbah ba ki paidbah ka Sohiong kila ibit ia u ban mih bujli haka jaka u bah HDR Lyngdoh (Bam Kwai Dwar U Blei), un trei shitom bad un iai buddien iaki kam ki ban wanrah ka jingmyntoi iaka konstitwensi bad ka jylla baroh kawei
