Shillong, Naitung 16: U Myntri Rangbah ka jylla u Cornad K Sangma mynta ka sngi u la pyntip ba la ka sorkar kala ai dak sniew ia ki 15 ngut ki kontraktor hapoh ka jylla namar ba ki khlem lah ban pyndep ban pyntrei ia ki surok PMGSY.
Haba kren ha ki lat pathai khubor u myntri rangbah ka jylla u Conrad u la ong ban pyniaid sted ia ki kam pynroi ha kane ka jylla la thaw ia ka App, kaba la tip kum ka “ Meghalaya Chief Minsiter Dashboard” bad hapoh kane ka app lah lah ban pynrung haduh 11 tylli ki jaid skhim jong ka sorkar bad kiba la dep bha ki long hynniew tylli ki tnad sorkar.
U myntri rangbah u la ong ba da ka jingdon ia kane ka App u la lah ban bud dien ia ka jingpyntrei kam ia ki skhim jong ka sorkar ha ka rukom kaba kham bniah na ka ophis jongu myntri rangbah ka jylla bad kane kala iarap shisha khamtam ia ki surok kiba dei na ka skhim PMGSY.
U myntri rangbah u la ong ba shuwa ba ka sorkar kan ai dak sniew kala da khot ia kito ki kontraktor bad ban ia ki ba ki dei ban pyndep noh ia ki jingtrei bad la ai por ia ki shisnem duna ban kin sdang ia ka kam hynrei haba kim pyni ia kata ka jingkwah trei ka jong ki ka sorkar ka ai dak sniew noh ia ki namar ba ki pynsah kut ia ki kam.
U Mytnri Rangbah u la iathuh ba ki surok PMGSY ha kane ka jylla ki dang don bun tylli kiba khlem pat pyndep wat la ia ki la dep ban ai sha ki kontraktor ba kin pyntrei haduh u snem 2001, bun ki surok kiba kum kine ki dang sah kiba khlem pat pyndep ia ki haduh mynta ruh.
Ka ophis jong u myntri rangbah kala buh ia ka WhattApp number 9436394363 ba ki paidbah kin lah ban pyntip la da don kino kino ki jongeh ha kaba ia dei bad ki jingtrei kiba ka sorkar ka pyntrei ki pynsahteng ha kaba ka sorkar kan sa budien ha dien ba kala ioh ia ka jingpyntip.
