Shillong, Lber 17: U Dr Azad Zaman MLA jong ka 47-Rajabla konstituency u la leit ban ai ia ka dorkhas sha u myntri rangbah ka jylla u Conrad K Sangma ban thaw District thymmai hapoh jong ka West Garo Hills District bad ka Rajpur ka dei ban long ka jaka pdeng ban buh ia ki ophis sorkar.
Ha ka dorkhas u Dr Azad u la kdew ba ha u snem 2012 ka kommittee kaba la tip kum ka “Plain Belt District Demand Committee” haka ai ia ka dorkhas sha ka sorkar ha katei ka por ban dawa ia ka District kaba thymmai hapoh jong ka West Garo Hills District.
Ha ka juh ka por u MLA ka Rajabala u la kdew ba ka sorkar kala dep ban thaw ia ki ar tylli ki District ka North Garo Hills District bad ka South West Garo Hills District, dei ha katei ka juh ka por ba ka PBDC ha ka 20th Lber 2012 kala ai ia ka dorkhas sha ka sorkar ban pynioh ia ka District bad ka Rajpur kan long ka jaka ban buh ia ki ophis sorkar.
U MLA ka Rajbala u la kdew ba ka jingdawa ban ioh ia ka District sha kitei ki thian kiba long madan ka long ban pynsuk ia ka sorkar ban peit ha kaba pyntrei kam ia ki skhim sorkar, ban pynjan ia ka jingtrei kam jong ka sorkar sha ki paidbah ban pynjan ia ki shnong nongkyndong sha ki jaka ba don ki ophis sorkar bad kane kan iarap ban khang ia ka jingtuid na nongkyndong sha ki jaka sor bad kan suk ha kaba teh lakam lada ka don ka huri hura.
U Dr Azad haba ai ia ka dorkhas sha u myntri rangbah ka jylla, u la kdew ba katei ka jaka ka don 2.5 lak ngut ki paidbah nongshong shnong bad ka jingjngai na Tura ka long haduh 170 km, lada thaw ia ka District kaba thymmai kan pynjan ia ka jingtrei kam jong ka sorkar sha ki paidbah.
Ban pynshong nongrim ia kane ka jingdawa District thymmai u Dr Azad u la ong ba kane ka jaka kaba ki dawa District ka don lai tylli ki C&RD Block, kata ka dei ka, Selsella, Demdema bad Tikrikilla, baroh ki shnogn ki don haduh 544, ka don 36 tylli ki GS Circle bad ki paidbah nongshnong shnong ki don 2.5 lak ngut.
Na ka liang jong u Dr Azad u la kdew ruh ba ha kane ka jaka ki don san tylli ki Assembly Constituency, saw tylli ki MDC konstitwensi, ki don san tylli ki kolej, 21 ki High School, 43 ki Secondary Schools, 110 ki Upper Primat Schools, 285 ki Lower Primary School.
Ha katei ka jaka ki don 35 tylli ki temples, 100 ki Mosque, 70 ki iingmane, ki don 30 tylli ki iew bad na Phedaldoba sha Tura ka jingjngai 170 KM. U Dr Azad u la ong ba, ban thaw ia ka District thymmai kam don kano kano ka rule. Haba ia dei bad ka kyrteng ai ka sorkar kan buh bad u la kyrapad ia u myntri rangbah ban pynrung ha kane ka dorbar mang tyngka kaba mynta na ka bynta ka jingbit jingbiang ki paidbah ka thain.
