Shillong, Lber 12: U Myntri Rangbah ka jylla Meghalaya u Conrad K Sangma u la iathuh ba ka Kommittee jong ka National Green Tribunal (NGT) kala shah ia ka jylla Meghalaya ban die arlak metrik ton u dewiong u ba dang don mynta 32 lak metrik ton.
Haba batai ia kane ka jingpynlait jong ka NGT ban dei arlak metrik ton, la ong ba na East Jiantia Hills yn shah 75000 Mt, na West Khasi Hills yn shah 50000 MT, na South West Khasi Hills yn shah 25000 Mt bad ka South Garo Hills 50000 MT.
Ka kompeni MSTC Ltd mynta kan sa buh ia ki jaka theh dewiong ha ki bynta bapher bapher jong ka jylla namar ba ia ka jingdie ia u dewiong yn leh lyngba ka kompeni MSTC Ltd bad ia ka jingdie yn sa tyrwa lyngba ki online ban ioh ia ka jingkhlieh dor.
U myntri rangbah u la batai ba ka MSTC Ltd kan shim ia u dewiong u ba dang don mynta bad kan die ia u kat sha kiba khlieh dor, na kane ka jingdie ka Coal India Limited kan shim 10% na ka jingdie, yn khate ia kabai shallan bad ia ka ba tam ym ai sha ki trai dewiong.
Haba ia dei bad kane ka sorkar kan shim ia baroh ki lad ki lynti ban pynthikna ba kan nym don shuh ka jingkhaii tuh, ka jingtih tuh ia u dewiong bad la btahh ia baroh ki bor sorkar ba ki dei ban beit bha ban nym don ka jingkhaii tuh bad lada lap ia kiba khaii tuh yn set patok san snem katkum ka kyndon kaba 21 jong ka MMDR Act.
U myntri rangbah u la iathuh ba ha ki shallan kiba thymmai yn buh da ia ka GR Kode ban pynthikna ba kan nym don ka jingkhaii tuh ne shna tuh ia ki shallan. U myntri rangbah u la pynpaw ia ka jingsngewuh ia ka Kommittee jong ka NGT kaba la shim ia kane ka rai bad da kane kan iarap ban pynioh ia ka jylla kumba T.30 klur bad lada ioh ban die lut ia baroh 32 lak MT u dewiong ka jylla kan ioh T.500 klur.
