Shillong, March 06: Kum shibynta ban pynphriang bad pynpur ia ka jingialehkai martial judo sha kiwei pat ki 10 tylli ki district headquarter jong ka jylla Meghalaya, ka sorkar Meghalaya lyngba ka Directorate of Sports & Youth Affairs bad District Sports Office jong ka South West Khasi ryngkat bad ka jing ia treilang bad ka Meghalaya Judo Association (MJA) yn pynlong ia Ka Free Demo cum Coaching Camp ha Mawkyrwat na duh 6 tarik Lber 2014 na ka bynta 10 days. Ia kine ki Camp la pynlong katkum ka jingkwah bad jing ai jingmut jong U Myntri Rangbah ka jylla Meghalaya. U coach jong ka Sports Authority of India (SAI), Sports Training Centre, Polo Shillong un shim ia ka kam hikai ia ka jingialehkai judo.
Haduh, la ioh ban pynlong kum kine ki camp ha Williamnagar, Resulbelpara, Nongpoh bad Tura. Ki camp kiba dang sah ki long ha Jowai, Khliehriat, Nongstoin bad Ampati. Kumta kito ki khun samla kynthei bad shynrang kiba kwah ban ia shim bynta ha ka judo ki lah pat ban ai kyrteng ha ki ophis jong ki District Sports Officer ne ki lah ban phone ha ki nongkitkam ka MJA ha kine ki number 9863043125/9863060576 ne email ha meghalayajudo@gmail.com. Hadien ki 10 tylli ki camp, ka DSYA & MJA kin pynlong pat sa Ka Meghalaya State Level Judo Championship 2014 ha Shillong.
Ka MJA ka pyntip ruh sha baroh ki nongialehkai judo ba kan don ka District bad State Level Selection Trials kaba hap ban pyndep hapoh ka 14 Lber 2014 khanag ba ngin ioh ban jied ki judokas ban leit ia shim bynta ha ka North East Games 2014 ka ban sa pynlong shen. Ka MJA ka dap ruh da ka jingsngew kmen ban pyntip ba ka Sorkar Meghalaya lyngba ka Directorate of Sports & Youth Affairs ka la ai ia ki judokas ka jylla da ki Safety Judo Mats ki ban shisha ka jingkyrkhu ia ki nongialehkai namr ka long kab eh ia ka Association ban ioh kum kine ki mats namar ki shongdor da ki lak tyngka. Lym kumta lada dei ba ym don ki mats jong Ka SAI STC Shillong, naduh mynno ka jingialehaki judo kaba la seng naduh u snem 1986 kan jin da la duh noh ha ka jylla ha Meghalaya.
Judo ka dei tang ma ka na ki jingialehkai martial arts ba la pynialehkai ha Ka Olympic Games naduh u snem 1964 bad 1984 na ka bynta ki shynrang bad kynthei ruh kumjuh. Judo ka dei ka jingialehkai kaba la sdang na Japan naduh 2000 snem mynshwa kum ka jingialehkai ban ia da ialade khlem da pyndonkam da kino kino ki tiar ba pynmynsaw bad kaba don ka jingiadei ka ban ym ktah ia ka jingle niam jong ki nong Japan. Ia kane ka jingialehkai la saindur da U Dr Jigoro Kano u ba dei u expert ha u snem 1882 da kaba shna ia ki kyndon ba lah ban ialehkai kum ka sports. Kumta da ki buit kumno ban ia da ialade, wat kiba rit briew bad kiba I tlot ki lah ban shim kabu ban jop ia kiba ialeh pyrshah ia ki wat lada ki kham heh ban ia ki. Kumta kane kan long ka jingmyntoi kaba khraw khamtam ia ki khynnah kynthei ban ioh ka lad wat ban ia da ialade (self-defense) lada don kiba mut ban niom bad niuh riot da ka bor ia ki kynthei. Wat ka Mary Komp ka la lah ban iada ialade na ki riewsniew namar ba ka pyntbit ialade da ka jingialehkai sports.(SP News)
