Shillong, Naiwieng 22: Saw tylli ki projek hapoh ka skhim PRASAD – Pilgrimage Rejuvenation And Spiritual Augmentation Drive na ka bynta ka jylla Meghalaya ki dei kiba la pyllait ha ka International Tourism Mart kaba 11- ka jingkyntiew ia ki jingdon jingem na ka bynta ki nongleitpilkrim sha ka iingmane jong ka Balang Presbyterian ha Nongsawlia, Nartiang Shakti Peeth, ka pungAitnar bad ka Charantala Kali Temple.
Ia ka International Tourism Mart kaba 11 la plie ha ka 12 tarik Naiwieng ha nongbah Shillong da u Myntri Khynnah jong ka Sorkar Pdeng ba dei khmih ia ka Tnat Kam Jngohkai, u ShripadYessoNaik ha ka jingiadonlang u Myntri Rangbah u Conrad K Sangma.
Hapoh ka Skhim PRASAD ka Tnat Kam Jngohkai jong ka Sorkar Pdeng ka la sanction 8 tylli ki projek kaba kot T. 256.45 klur na ka bynta ka jingkyntiew ia ki jaka leitpilkrim ba la ithuh ha ki jylla ka thain shateilammihngi.
Ka Durga Temple ha Nartiang ka dei ka jaka kaba khringbha ia ki briew kiba leitjngoh ia ka deiriti ha Jaintia Hills bad kane ka don hajan ka jaka kaba bun bha ki mawbynna. Ka iingmane jong ka Balang Presbyterian ha Nongsawlia, kadei kaba la shna ha u snem 1846 da u Thomas Jones, kalong kawei na ki iingmane ba la rim tam ha ka thain shateilammihngi jong ka ri.
Ka pung Aitnar kadei ka bynta ba kongsan jong ka lehniam Behdienkhlam, ka jinglehniam kaba heh tam jong ki Pnar. Ka Charantala Temple ha West Garo Hills kadeika jaka mane kaba kongsan na ka bynta ki jaitbynriew Hajong bad ki Koch ha ka thain bad kane ka jaka ka khring ruh ia bun ki briew kiba nabar.
Ka Sorkar India ka la plieia ka skhim PRASAD ha u snem 2014-2015 hapoh ka Tnat Kam Jngohkai. Ka jingmut ba pura jong ka Skhim PRASAD kalong ‘Pilgrimage Rejuvenation And Spiritual Augmentation Drive’.
Kane ka skhim ka phaikhmat ban kyntiew bad ithuh ia ki jaka leitpilkrim ha kylleng ka ri ban kyntiew ia ki kam jngohkai kiba iadei bad ka niam. Ka thmu ban pyniasoh ia ki jaka leitpilkrim ha ka rukom kaba la pynkhreh bha bad kaba lah ban iaineh kaba don lut ki jingshakri na ka bynta ki nongjngohkai. Ka jingkiew ki kam jngohkai ha ka thain ka shong ha ki kam jngohkai kiba iadei bad ka jingleitpilkrim.
U Myntri Rangbah jong ka jylla Meghalaya ha ka jingialang plie u la pynpaw ka jingkmen ba ka nongbah Shillong ka ioh ban pynlong ia ka International Tourism Mart ha ka sien kaba ar.
U la ong ba ka Sorkar India, hapoh ka jingialam jong u Myntri Rangbah duh, ka bteng ban pynthikna ba ka thain shateilammihngi ka kiew ryngkat bad ka ri baroh kawei da kaba plié lut ia ki lad kiba don ha ki kam bapher bapher ka ban wanrah ia ka lawei bad ka ioh ka kot kaba kham bha ia ka thain.
U la pynpaw ruh ba ka International Tourism Mart ka la long kaba kongsan ban plié ia ki lad kiba don ha ka thain shateilammihngi kiba iadei bad ki kam jngohkai, da kaba pyni ia ka deiriti ba kyrpang jong ka thain, ka pateng, ki dustur tynrai bad ki tiar bad kalong ka jaka pdeng ha kaba kito kiba don bynta ha ki kam jngohkai ki lah ban pyniasoh bad ki nongthied kiba nabar ri bad kumjuh ruh na ka ri.
