Shillong, Nailur, 13: Ka Central Bureau of Communication (CBC), Shillong, ka la pynlong ia ka Integrated Communication and Outreach Program (ICOP) halor ka Nasha Mukt Bharat Abhiyan, mynta ka sngi ha Don Bosco Technical School, Shillong.
Ka prokram ka thmu ban wanrah ia ka jingsngewthuh hapdeng ki samla pule shaphang ki jingma kiba mih na ka jingdih pynbuaid bad ban kyntiew ïa ki jingpyrshang lang ban tei ïa ka imlang sahlang kaba koit ba khiah, kaba don ka jingkitkhlieh bad kaba lait na u drok.
Haba ai jingkren ha kane ka jingialang, u Principal ka Don Bosco Technical School u Fr. Shiningstar Dkhar, u la pdiang sngewbha ïa ki ophisar jong ka Central Bureau of Communication bad ki Resource Person kiba la jied ïa kane ka jaka pule kum ka jaka ban pynlong ïa kane ka prokram ai jingtip kaba kongsan. U la ban jur ia ka jingdonkam jong kane ka sienjam na ka bynta ki samla pule ha kane ka por kaba kongsan ha ka jingim jong ki.
U Principal u la ong ba ka Sorkar India ka la shim ïa ka jingïakhun pyrshah ïa ka jingdih drok kum ka jingkitkhlieh lang, kaba sdang na ka jingpynsngewthuh ia ki briew bad kaba bteng sha ki longïing, ki jaka treikam bad ka imlang sahlang hi baroh kawei. U la ban jur ba ka jingdih drok ym tangba ka pynjot ïa ki jingangnud bad ka lawei jong ki samla shynrang bad kynthei hynrei ka ktah ruh ïa ki longïing bad ka imlang sahlang.
Haba iathuh ia ki jingshem jong u ha ka jingiakren bad ki samla kiba la ïakhun pyrshah ïa ka jingkhuslai jingmut bad kiwei kiwei ki jingeh, u Fr. Shiningstar Dkhar u la ban jur ia ka jingdonkam ban sngewthuh ia ki jingeh jong ki bad ban ai ka jingkyrshan ia kito kiba shah ktah. U la kyntu ia ki samla pule ban sngap bha ia ka jingpynshai, ban sngewthuh ia ka khubor jong ka bad ban rah shakhmat ia ka sha ki paralok bad kiba haiing hasem jong ki da kaba long ki nongmihkhmat jong ka imlang sahlang kaba lait na u drok.
U Bipul Das, DSP Crime, East Khasi Hills, ha ka jingai jingkren jong u, u la pynsngewthuh ïa ki samla pule shaphang ki jingsniew jong ka jingdih pynbuaid bad ka jingdonkam ban jied da ka jingsngewthuh bad ka jingkitkhlieh.
Haba kren shaphang ka jingktah jong ka jingdih pynbuaid, u Das u la batai ba ki jingdih pynbuaid ki lah ban ktah ia ki dkhot bapher bapher jong ka met, kynthup ia ka jabieng, u klongsnam bad ki tor. U DSP u la kren ruh shaphang ki jingngeit bakla shaphang ka jngpyndonkam ia ki drok bad u la pynshai ba bun ki samla pule kim ju pyndonkam ia ki jingdih kiba ktah ia ka met jong ki.
U la maham ba wat ka jingpyndonkam kaba malu mala ne kaba tang shisien ruh ia ki katto katne ki jingdih pynbuaid ka lah ban wanrah jingma ia ka met kaba dang san bad ban sangeh ban pyndonkam ia ki jingdih pynbuaid ka lah ban long kaba eh namar ki jingkylla ha ka jinglong jong ka jabieng.
Haba kren shaphang ka jingpynbor jong ki paralok, u Das u la kyntu ïa ki samla pule ban ithuh ïa ki jinglong jingman ha kaba ki paralok ne kiwei pat ki lah ban pynbor ïa ki ban pyrshang ïa ki jingdih kiba ktah ia ka met. U la pynshlur ia ka jingialam lynti kaba bha jong ki paralok, ha kaba ki paralok ki kyrshan ia ki jingjied kiba bha bad ki pynshlur iwei ia iwei pat ban kiar na u drok.
U la ai jingmut shuh shuh ïa ki samla pule ba kin long kiba husiar ïa ki jingkylla ha ka jinglong jong ki paralok, kynthup ïa ka jingkylla kynsan ha ka jinglong, ka jingduh jingsngewtynnad ha ki kam ba ki ju leh, ka jinghiar ha ka jingpule, ka jingbym wan skul thikna, ka jingleh buhrieh, ki jingkylla ka rukom thiah ne rukom bam bad ka jingtlot ne jingking baiong kaba ipher.
U la pynshlur ia ki khynnah skul ba kidei ban iathuh ia kiba la heh la san kiba ki lah ban shaniah, ki kmie ki kpa, ki nonghikai, ki nongai jingiasyllok ne kiba haiing hasem lada ki tip ba don mano mano ba donkam ia ka jingiarap.
U DSP u la ban jur ba ka kyiad, u duma, ki sikret bad ki electronic cigarette ki don ia ki jingma kiba khraw ia ka koit ka khiah, khamtam eh ia ki samla. U la pynshlur ia ki samla pule ban shim ia ki lad ki lynti kiba koit ba khiah kum ka jingialehkai, ka jingshad, ka jingniah cycle, ka jingsaindur, ka put ka tem, ka jingthoh bad ka jingpynlut por bad ki paralok bad kiba haiing hasem. U la ban jur ruh ia ka jingdonkam ban don ka jingngeit skhem halade, ka jingiakren kaba laitluid bad ban wad ia ka jingiarap haba ki don ha ki jingeh.
U Das u la kyntu ia ki samla pule ban bam smai ban sumar ia ka met bad ka jingmut jingpyrkhat jong ki, ban shim ia ki rai khlem da ka ngop ha ki jingpynbor jong ki paralok, ban kren shai bad da kaba jai jai, ban peit ia ki paralok jong ki bad ban wad jingiarap na ki rangbah kiba lah ban shaniah ha kano kano ka por ba donkam. U la kyntu ïa ki ba kin long kiba don jingtip, ban pynneh ïa ki jingmlien kiba koit ba khiah bad ban long ki nongmihkhmat kiba don ka jingkitkhlieh na ka bynta ka Nasha Mukt Bharat Abhiyan.
Ha kane ka prokram la don ruh ki prokram ai jingtip, kynthup ïa ka jingïakop thoh essay bad quiz, ha kaba ki samla pule ki la ïashim bynta shitrhem. La ai khublei ia ki nongiashim bynta bad ki nongjop khusnam na ka bynta ka jingshim bynta shitrhem jong ki bad ki jingnoh synniang kiba don jingmut ha kaba pynsaphriang ia ka jingtip shaphang ki jingma na ka jingdih drok.
Ka prokram ka la ban jur ia ka jingdonkam jong ka jingpynsngewthuh kaba iaineh, ka jingkitkhlieh shimet bad ka jingtreilang ha kaba pynurlong ia ka jingthmu jong ka Nasha Mukt Bharat.
