Shillong, Nailur, 16: Ka seng party BJP ka Meghalaya ka ai khublei iaka sorkar Meghalaya na ka bynta ba kala weng noh iaka jingioh bynta ha ka phang nyngkong jong ka MBBS hadien ka jingujor na ka liang ka kynhun party ha jylla bad kiwei ki kynhun kiba pawkhmat jong ka jylla.
Halor ka jingpeit bniah iaka jingioh pyn bynta la lap ia kiei kiei ki jingleh bakla bad jingleh thurmur, ha kaba iaki samla pule kiba ioh ki kyrdan kiba kham ha khlieh la kyntait noh, pynban la shim bad pynbiang pynban ia kiwei pat ki samla pule kiba kham bad hapoh ka kyrdan.
U bah Mariahom Kharkrang, Lamphang ka party BJP, Meghalaya u la ai khublei iaka sorkar kaba ialam da u Myntri Rangbah ka jylla Meghalaya, u Conrad K. Sangma uba la shimkhia iaki jingkyntait da u MLA ka BJP, u bah A. L. Hek bad ka kynhun ki samla pule.
Ha kawei pat ka jingthoh kaba dei kaba la phah shakhmat ia u Myntri ka koit ka khiah bad kaba la phah kopi ruh sha u Myntri Rangbah, u Hek u la pynpaw iaki jingshisha halor ki jingbymbiang bad ki jingpynkhein iaki kyndon kiba la pdiang ha ka rukom jied iaki nongiakhun eksamin.
U ngeit skhem ba ka Sorkar kan pynshisha iaka jingshisha bad ka jinglong kaba biang ha uwei pa uwei bad ha baroh baroh ryngkat ha kane ka rukom jied kaba thymmai, bad u la kitbok kit rwiang iaki samla pule kiba dei ban ioh.
