Shillong, Jylliew 15: Ki heh jong ka tand ministry Road Transport Highway jong ka sorkar pdeng mynta ka sngi kila wan ban ia kynduh ia u Chief Secretary jong ka jylla Meghalaya ban ia kren halor ki skhim shna surok ha kane ka jylla Meghalaya kiba dang ap mynta ban ioh ia ka No Objection Certificate na ka sorkar jylla.
Ha kane ka jingiakynduhn na ka liang jong ka seng Hynniewtrep Achik National Council (HANC) kawei na ki seng bhalang West Khasi Hills ruh kala ia don lang ha kaba kila ai da ka Dorkhas ha kineki heh jong ka sorkar pdeng kaba la lam khmat da u V R Rajwat bad sha u Chief Secretary ba kum ka seng ki kwah ban pyntrei ia kine ki surok ha West Khasi Hills.
Haba kren ha u SP News Agency ha phyllaw secretariat ha dien ba kila dep ban ia kynduh ia ki heh jong ka sorkar pdeng bad ia u Chief Secretary ka sorkar jylls, u Bah Riki Sohlang president ka seng HANC u la iathuh ba ha kane ka jingiakynduh na ka liang jong u V R Rajwat, u la kren shai ba ia ka NOC ban shna ia ki surok hapoh jong ka West Khasi Hills dei ban ai noh hapoh shibnai lada yn lah kin rah noh ia ki skhim sha shna surok na kane ka jylla sha wei, baroh ki skhim shna surok ki la kot kumba T.4000 klur tyngka na ka bynta ka jylla Meghalaya.
U Bah Sohlang u la ong ba na ka liang jong ka seng ka kwah ba ia kane ka surok dei ban shna noh na ka bynta ka jingmyntoi kipaidbah katei ka thaiñ, u ong ruh ba ka KHADC ka dei ban ai ia ka NOC ha kaba ia dei bad kine ki surok, ha kane ka sngi la wan ruh ban synrang lang da ki rangbah shnong kiba don saw dong ka thaiñ Rangblang ha kane ka jingiakynduh bad ka sorkar.
Halor kine ki surok ha West Khasi Hills bun na ki seng bhalang kila pynpaw ia la ki jong ki jong ki jingsngew ha kaba ki don kiba pyrshah ia kine ki surok bad ki don ruh kiba pdiang sngewbha. Kine ki surok baroh ki don sawdong jong ka jaka ba don Uranium.(SP News)
