Shillong, 
Nailur 29: U bah Shniahlang Suchen President ka seng HANM jong ka War Jaintia la ong ba ka jingiakynduh jong ki ia u myntri kam poh iing ka long halor ka jingdon ki shipai BSF ha shnong Amlarem kiba la pyndik ia ki paidbah ia ki kali ka leit ka wan.
U Bah Shaniah Suchen haba kren ha ki lat pathai khubor ha dein ka jingiakynduh ia u myntri kam poh iing la ong ba ha kane ka jingiakynduh u bah Lahkmen la iathuh ba u la dep ban ia kren bad Inspector General ki shipai BSF bad kum juhbad u Director General ki pulit ka jylla halor kane ka jingeh ba ia kynduh ki paidbah.
Ha kane ka jingiakynduh na ka jingkren u myntri kam poh iing kala paw shai ba kala biang palar hynrei kum ka seng kin ap ia ka por ba ka jingiakren u myntrikam poh iing bad u IG ki shipai BSF ka leh ne em ban urlong lada ka jingiakren kam urlong kum ka seng kan shim noh da kawei ka lynti.
Ha kine ki sngi kiba la leit noh ka jingshah thombor ki paibah nongshong shnong ka War Jaintia ha ki shipai BSF kala long sha ba palat, ha ka jingshisha ki BSF ki dei ban peit ia ka rung ka mih jong ki khar Bangladesh, ha ka jaka ba kin peit ia ki khar Bangladesh ki pynklumar shnong pynbna ia ki paidbah nong India.
La ong ba wat ki paidbah kiba wan iew na Jowai ki thied ia ki khaw na ka bynta ban bam ha iing, ia ki jhur ki piat hynrei ha shiteng lynti ki shipai BSF kila pan jingthoh, kum ki GST bad ki kot ki sla ba ki thied nangno, ia ki tiar kiba pyndonkam ha iing ioh nangno kein kita ki GST.
U nongialam jong ka HANM la kynnoh ba kine ki shipai BSF kila pyndik wat ia ki khynnah ia ki kynthei kiba leit sum, khamtam sha ba ki leit sha bri kwai bad ka don ka jingar tatien ba ioh ki thombor ia ki kynthei ha kane ka jingiakynduh kila pynbor ia u myntri kam poh iing ban shim khia.
Ha kane ka jingiakren la pynsngew bah ki shipai BSF kim dei ban pynwit ia ki kali kiba kit ia ki marbam mardih katei ka thain, hynrei lada ki kwah ban talasi ia ki kali ki dei ban leh ha khappud ym ba kin wan sha ki shnong ki thaw bad pan ia ki kot kali, ka kamram jong ki kam dei ban peit ia ki kali.
Ha kane ka jingiakynduh ka seng HANK kala ai por ia ka sorkar hynniew sngi bad lada kane ka jingthom bor ka dang iaid sha khmat naka liang jong ka seng bad ki paidbah kim ban se ban mih bad ban thombar ia ki da ki paidbah, la ong u bah Shaniahlang.
U bah Lamphrang Kharbani u la bynrap lang haba kren lang la ong ba kum ka seng HANM kim lah shuh ban shu sngap, ka kam jong ki BSF ban peit ia ka jingwan rung ki khar Bangladesh kiba wan rung sha India.
Ia ka jingkem ia ki nongthuh, kem mar khaii beain kim ong ei ei namar ka dei ka kam jong ki hynrei ban pyndik ia ki paidbah ka seng kam lah ban shu peit kai ia kane ka jingleh ki shiapi BSF ban pyndik ia ki paidbah.
