Shillong, Jylliew 15: Ai por ka JSU hapoh 24 kynta ia ka ophis u Deputy Commissioner ban ai jingpynshai daka jingthoh halor ka jingioh Environmental Clearance ka Star cement na Delhi khlem ka Public Hearing bad nalor ba bun ki nongpyrshah.
Ki nongialam ba ha khmat ka seng JSU seng kmie mynne ka sngi ki lah leit buh daka jingthoh bad ia kren hakhmat u ADC ka East Jaintia Hills District ban pan jingshai halor ka jingpynmih khubor ka Star Cement ba ka lah ioh iaka Environmental Clearance na ka Minsitry of Environment,Forest & Climate Change (MoEF&CC) na ka sorkar India na Delhi.
Ki nongialam ka seng ki lah pynpaw ba na ka liang ka seng JSU naduh nyngkong ki sngi ka ieng haka nongrim ban pyrshah jur iaka ka jingthmu ka Star Cement ban tih ia u Mawshun na Brichyrnot haduh 42.05 hectar namar ka ktah iaka wah Lukha bad ka wah Lunar bad kumjuh iaka jingjan jong ka Narpuh Wildlife Sanctuary kumba 2.8 km na ka jaka tih mawshun.
Ka jingdon ka Eco Sensitive Zone 1.4 km na katei ka jaka ba lah thmu ban tih mawshun ka Star Cement namar kane ka ktah bha iaka mei mariang jong katei ka thaiñ hi baroh kawei bad kabuh jingeh iaki nongshong shnong kiba hajan bad katei ka par tih mawshun.
Ka seng ka lah buh jingkylli ia ka sorkar jylla ,iaka bor distrik jong East Jaintia Hills bad iaka Meghalaya State Pollution Control Board (MSPCB) ba mano ba lah ai bor bad ai jingthoh iaka Star cement ban ioh iaka Environmemtal Clearance na ka Ministry of Environment,Forest and Climate Change.
Ka seng ka lah ai por hapoh 24 kynta ia ka ophis u Deputy Commissioner ban ai jingpynshai daka jingthoh halor katei ka jingioh Environmental Clearance ka Star cement na Delhi da kaba iaid lait khlem da iohlad ban pynlong iaka Public Hearing nalor ba lah paw shai ba bun ki kynhun kiba pyrshah ban tih mawshun na katei ka jaka.
ka seng ka lah buh ruh ia ka jingkylli iaka Meghlaya State Pollution Control Board halor ka shithi ba ka MSPCB ka lah phah sha ka MoEF&CC ha Delhi kaba ong haduh 280 ngut ki kynhun ne ki seng kiba lah thoh sha ka MPCB bad ai jingkyrshan ban tih ia u mawshun na Brichrnot bad tang 6 tylli ki kynhun kiba pyrshah.
Ka seng ka pynrem jur iakane ka shithi jong ka MSPCB ba la thoh da u Member Secretary jong ka MSPCB sha ka tnat MoEF&CC bad naka liang ka seng ka lah phah sei iakita ki kot na ka ophis u DC ban pynshisha ia kita ki 280 tylli ki kynhun kiba jingkyrshan da ka jingthoh sha MSPCB.
