Shillong, Jylliew21: U myntri rangbah ka jylla u Dr Mukul Sangma mynta ka sngi u la ai ia ki kot ki sla sha ka Meghalaya State Olympic Association (MSOA) ba kan sdang ban ioh thep ban pan ba ia ka National Games jong u snem 2022 dei ban ioh ban pynlong ha ka jylla Meghalaya kum shi bynta ban rahe ruh ia ka jingdap 50 snem ka ka jingioh jylla.
Ban kyrshan ia kane ka jingkwah jong ka sorkar jylla, u Dr Donkupar Roy nongialam ka liang pyrshah ruh u la ia don lang bad u MP jong ka Shillong u Bah Vincent H Pala bad shibun ki myntri sorkar ryngat ki MDC jong ka KHADC bad ki nongialam jong ka MSOA kila ia don lang ban pynpaw ia ka jingtrei lang ban ioh wanrah ia kane ka jingialehkai sha kane ka jylla.
Ha kane ka sngi u myntri rangbah ka jylla u Dr Mukul Sangma nalor ki kot ki sla kiba don kam, la ai ruh ia ka cheque kaba T.50 lak ba ka MSOA kan sdang ban ia knieh ban pynioh ban wanrah ia ka jingialehkai National Games 2022 sha kane ka jylla. Lada ka jylla ka ioh ia kane ka jingialehkai kan long kaba biang eh namr ba ka jylla kan dap sanphew snem ka jingioh jylla ha u tei u snem.
U myntri rangbah u la ong ba ka jingsuki ha ka jingtrei kam kam dei ban don jaka namar hap ban leh bun kiei kiei bad u la kyntu ba dei ban don ia ka committee kaba ha khlieh duh ban peit ia kane kam ha kaba dei ban shim na ki liang baroh, ban pynurlong ia kane ka jingkwah don kam ban shna bun kiei kiei namar kin don haduh 32 tylli ki jaitjingialehkai kiba ialeh kai hapoh ka Olympic bad phra tylli ki jingialehkai ki bym dei hapoh jong ka Olympic.
Ha ka jingkren jong u Dr Donkupar Roy nongialam ka liang pyrshah u la ong ba u ai ka jingkyrshan kaba pura na ka bynta ban ia khun ban ioh ia kane ka jingialehkai kaba khraw ha poh jong ka Ri bad ha ka juh ka por u la kyntu ba dei ban leh ia kane ha kaba beit bad ha ba shit ba shai bad kane kan long ka lad ia ki samla ka jylla ba kin pynkhreh ia lade ba kin ioh ban rung ha kane ka jingialehkai.
Ha kane ka sngi na ka liang jong u Working President jong ka MSOA u bah John F Kharshiing u pyni kumno ban leh ha kaba ia dei bad kane ka jingpan ban wanrah ia kane ka national Games sha kane ka jylla. Kumba ka long ki jylla ha North East kiba la ioh ban pynlong ia kane ka jingialehkai dei tang ka Manipur ha u snem 1999 bad ka jylla Assam ha u snem 2007.
