Shillong, Naitung 23: Ka HYC Mawlai circle mynta ka step ka la leit jurip ia ka NEHRU Memorial State Dispensary ka jaka ai jingsumar kaba la rim tam ha shnong Mawlai, kaba don ha Mawlai Nongpdeng.
Ka Seng ha kane ka jingjurip, ka la lap shibun ki jingduna Jong kane ka Dispensary. Haba iakren bad u President ka HYC Mawlai circle Bah Donboklang Kharlyngdoh u la Ong ba ngi Im ha kine ki sngi, kiba man uwei pa uwei u nongshong Shnong ngi hap ban iakhun pyrshah ia ka Khlam COVID-19.
Ha kane ka jingiakhun ngim lah khlem da ai burom naduh ka Sorkar, ki nongtrei ka koit ka khiah, ki bor pulit, ki Durbar shnong haduh ki riew Paitbah kiba la iasnoh kti lang ban bud ryntih ia ki jinghikai ka tnad ka koit ka khiah.
Kaba sngewlyngngoh ia ngi ka long ba kane ka tnad, kaba ju hikai ia ka physical distancing bad ka jinglehkhuid leh suba, ka kylla mar khongpong hangne ha Dispensary, hangne ngi lap ba ki kamra ba ki staff kiba ym duna ia ka 15 ngut ba ki shong ki long kiba khapngiah, para ma ki hi, la ia pynkhein ia ka physical distancing, kumjuh ruh ki nongshim dawai namar ka jingrit palat ka jaka, ka sawdong sawkun kam long kaba khuid namar ka jingbym don ki nala pyntuid ia ki jaboh, ka jaka leit bar ruh la pyndonkam bad staff bad nongpang tang kawei, ka um ruh kaba long kawei ka bynta ka donkam tam, ha kane ka dispensary la hap shu thied, namar ym don pipe line connection.
U Bah Donboklang u la iathuh shuh shuh ba kum ka Dispensary ha kine ki Snem ba la leit, ka la ai ka jingshakri kaba bha tam ia 6 tylli ki Durbar shnong, Nongpdeng, Nonglum, Syllaikariah, Motsyiar Umjaiur bad Phudmuri, ha kaba ka jingdonbriew kam duna ia ka 21309 ngut na ki 4474 ki tnum iing.
U la Ong ba man ka por ki nongshim dawai na kitei ki 6 shnong ki ju bun bha, ha ka shisngi shisngi, Hynrei mynta ki don tang kumba 20 ngut, kane ioh lehse dei, ba ki nongpang ki salia ia ka jingkhapngiah ka jaka namar ioh ia takhuh haba ieng lain para ma ki.
Kumta na ka Liang Jong ka HYC Mawlai circle, ha kum kane ka por iakhun COVID-19, u la Ong ba ngi dawa na ka ophis u DMHO East Khasi Hills, U DHS bad khamtam ia u Myntri badei peit ia ka tnad ka koit ka khiah Bah AL Hek ba ki dei ban pynkynriah noh kloi Sha kiwei ki jaka kiba kham biang, kham kylluid ia kane ka Dispensary kaba la shu shong wai da ki phew snem ha kane ka jaka kaba khapngiah.
Ha kajuh ka por ka seng ka dawa ba ka sorkar ka dei ban shimkhia ban pynioh noh ia ka permanent campus na bynta kane ka Dispensary, la ong u bah Bashan Lyngdoh Mawnai General secretary HYC Mawlai circle ha ka kyrwoh.
