Shillong, Naitung 31: U wei na ki riew trei mon sngewbha U Bah James Syiemiong mynta ka sngi u la phah da ka shithi sha ka President jong ka Ri India Ka Droupadi Murmu halor ka jingshah kem jongg arngut ki Sister ha ka 26/ Naitung/2025 da ki dkhot ka Bajrang Dal ha ka jylla Chhattisgarh.
Ha kane ka shithi u Bah Syiemiong u la kdew ba ha ka kot khubor The Hindu bad kiwei kiwei ki lad pathai khubor ki la thoh ba ka jing kynnnoh ba ki la pynkylla niam jubor ka long ka bym don nongrim haei haei ruh ,ka jing shah ban bein ki kristan ka ju jia na ka por sha ka por .
U ne u rangbah u la kdew ba kat kum ka riti synshar ka Ri India ka Artikle kaba 25 ka la kren shai ia ka jing laitluid ha ka ban bud ia kano kano ka niam u ne ka nong shong shnong jong kane ka ri kaba khraw .
Kat kum kane ka shithi kaba la phah sha ka president,u la kyntu ia ka president ba ka dei ban phah pyllait noh mardor ia kitei ki arngut ki sister kiba la shah pharep khlem kano kano ka jingteh kyndon bad ba dei ban weng lut noh ia baroh ki jing kynnoh pyrshah ia ki .
Ha kajuh ka por u tei u rangbah u la dawa ba dei ban phah tohkit ha ka CBI halor ka jingleh kaba man ka por jong ka kynhun Bajrang Dal ,la dawa ruh ba dei ban don ka jing bthah ia baroh ba kan don ka jingiada ia ki kynhun kristan na ka jingshah pyntieng pynsmiej.
La ong ba bun na ki kynhun kristan ha kane ka Ri India ki la trei shitom ha ki kyndong kynshrot na ka bynta ban kyntiew ia ki paidbah nongshong shnong ha bun ki liang bad ka jingthoh ia kane ka shithi ka long ban kyntu ia ka president ban pynioh ia ka hok u paidbah nongshong shnong ia ka jinglaitluid bad ban khang lad ia kino kino ki jingleh kiba long pyrshah ha ka imlang sahlang ia kane ka shithi la phah sha ka president lyngba u Lat ka Jylla mynta ka sngi.
