Shillong, Nailur 17: U Myntri Rangbah ka jylla u Cornad K Sangma haba jubab ia ka mat ia kren bala wanrah da u bah George B Lyngdoh lyngba ka “Zero Hours Notice” halor ka jingshah thobor ki khasi ha Bangladesh, la ong ba ka sorkar jylla kala pynphah ia ka dorkhas sha ka sorkar pdeng kaba la phah da wei na ki riew paidbah.
U Myntri rangbah ka jylla u la ong ba kane ka kam hapdeng ia dei bad kiwei ki ri ka dei ka bynta jong ka sorkar pdeng lyngba ka tnad kam bar ri, namar ka sorkar ka don ka jingsngewkhia ia kane kala phah ia ka dorkhas sha ka sorkar pdeng ha dien ba la ioh pdiang na u wei riew rangbah na ka jylla.
U Myntri rangbah ka jylla u la ong ba katkum ki jingtip kiba la ioh na ki lat pathai khubor la ong ba kala don ka jingshah pynjulor ki jaka rep kiba dei jong ki Khasi bad ki Garo ha Bangladesh bad kila don haduh 28,000 tynrai kiba la shah pynjop bad kala don ruh ka jingshah shoh lai ngut ki briew kila mynsaw.
Haba ia dei bad kane kala don ka jingiaid paidbah hapoh Bangladesh ban leit sha Deputy Commisioner ophis jong ka Bangladesh ban dawa ban pynneh ia ka jinglong trai ki khasi ha kaba ia dei bad ka khydnew ka shyiap.
Ka sorkar jylla kam lah ban leh ei ei namar ka iadei bad kawei ka Ri, halor kane ka sorkar kala phah sha ka tnad kam bar ri jong ka sorkar pdeng ia ka jingthoh kaba la ioh pdiang na ki riew paidbah ba kan ia kren bad ka sorkar Bangladesh.
Haba wanrah ia kane ka jingiakren hapoh ka iing dorbar u bah George u la ong ba wat la ki Khasi bad garo kiba shah thombor ha Bangladesh ka don ka jingsngew kum ki para jaidbynriew namar la pyniakhlad da ka jingphiah ia ka Ri India bad u kynrad ia ka sorkar jylla ba kan peit lem ia kane ka jingeh jong ki paidbah Khasi bad Garo ha Bangladesh.
