Shillong, Naiwieng 22: Ban pyniasoh ia ka South Garo Hills District bad ka nongbah Shillong lyngba ka Ranikor, Mawkyrwat ka sorkar pdeng kala dep ban mang pisa ban shna ia ka surok na Baghmara South Garo Hills District sha 18 miles ha Ranikor kaba hap hapoh jong ka South West Khasi Hills District.
Katkum ki lat khubor kiba u SP News Agency u la ioh la sngewthuh ba ia kane ka surok la phiah haki lai bynta ban shna ia ka, na 18 miles ha Ranikor sha duh Nongjri, ka bynta kaba nyngkong, ka bynta kaba ar kan long na Nongjri sha Maheshkhola bad ka bynta kaba lai ka long na Maheshkhola sha Baghmara.
Na ka liang jong ka PWD kala dep ban ai ia ka jingtrei sha ka Kompnei ban pyntrei na 18 miles Ranikor sha Nongjri bad kane ka jingtrei kala iaid sted bad ka jingtrei tang ban tih khydnew kala jan dep, katba ia ka bynta kaba ar bad ka lai ka PWD haduh mynta kam pat ai ban trei.
Haba ia dei bad kane ka jingbym pat ai trei ia ka bynta kaba ar bad balai ki thymmei khubor napoh jong ka tnad PWD ki pynsngew ba ka daw kam dei na ka liang jong ka PWD hynrei ka jingbym pat lah ban sdang ka dei na ka jingbym pat ioh ia ka jingbit na ki trai khyndew katto katne bad kane kala pynshteng ia ka kam.
