Shillong, Nailur 8: Ka jingbym poi jong u nongialam ka Congress Legislature Party (CLP) u Dr. Mukul Sangma sha ki ar tylli ki jingialang jong ka party Congress, kawei ka jingpynrung congress ia ki lai ngut ki riew paw khmat, bad ka jingwan biang ki ar ngut ki nongialam u bah RG Lyngdoh bad u bah PN Syiem kaba la long ha ka sngi palei.
Kaba la kham pynkyndit shuh shuh ia ki nontrei ka party Congress ka dei ka jingbym poi jong u Dr Mukul ha ka jingialang ban aiti ia ka kam MPCC President na u Dr Celestine Lyngdoh sha u bah Vincent H Pala kaba la long mynta ka sngi ha State Convention Centre, ka jingjah kam dei tang u Dr Mukul hynrei baroh ki MLA jong ka party Congress na garo Hills.
Kane ka jingbym poi jong u Dr Mukul mynta ka sngi sha kane ka jingialang ha State Convention Centre mynta ka sngi bun na ki nongtrei jong ka party na ki District bapher bapher kila don ha ka umdum ban ioh ba u nongialam ka CLP un pep bad kaba la kham pynkyndit shuh shuh dei ka jingbym poi wat tang u wei u MLA na Garo Hills.
U General Secretary ka AICC u Mansih Chatrath haba kren ha ki latpathai khubor u la ong ba kan shym don kano kano ka jingiapaid hapoh ka party Congress, ka jingbym poi jong u Dr Mukul sha kane ka jingialam kam dei ba ka don ka jingiapaid hapoh ka party, la ong ba ka party ka long tylli kawei.
U bah Pala kum u President ka MPCC ba dang shimti la ong ba un sa leit ban ia kynduh ia u Dr Mukul bad kaei kaei kaba un iaid ha khmat un ia mir jingmut bad ki nongialam jong ka party kum u Zenith M Sangma bad kiwei ki nongialam u la ia kren ruh bad u SC Marak nongialam ka party na Garo Hills.
