Shillong, Jymmang 26: Mynta ka sngi 26/Jymmang/2026 da ki spah ngut kiba kamai Rapido ha kane ka nongbah Shillong kiba la dep ban register bad kawei ka App kaba na shabar ka jylla kila leit ban tur sha ka ophis jong u District Transport Officer jong ka East Khasi Hills District kaba don ha Lachumiere ban pan ia ka jingshai la ka jingkamai Rapido ka long kaba kumno la ki dei beain ne ka long kat kum ka ain.
U bah Wilfred Kharbuli haba kren ha ki lat pathai khubor u la kren shai ba ka jingleit jong ki sha ophis jong u District Transport Officer ban pan ia ka jingshai haba iadei bad kane ka jingkamai Rapido namar ba kila shah khynra ha ki bor jong ka ain, dei hangne ba ki kwah ban ioh ia ka jingshai namar ba kila dep ban register bad ka App bym dei na kane ka jylla.
Ha kane ka jingiakren la sngewthuh ba ka sorkar kam ioh kano kano ka khajna na kane kaba ki kamai Rapido bad mynta ka sorkar kala sdang ban pyntrei kam ia la ka jong ka App bad kala ai ruh ia u registration number na ka bynta kiba kamai da ki kali ar shaka halor kane ka jingleh ka sorkar ki pdiang sngewbha khnang ba ka sorkar ruh kan ioh ia ka khajna.
U bah Wilfred u la ong ba um kwah ban ong eiei ia kiwei pat ia kaei kaba ki wan mynta ka long ban ia kren beit tang na ka bynta kiba kamai Rapido kiba la register bad katkum ka jingkhein kaba ki ki don kiba la dep ban register ki long palat ia ka ar hajar tylli ki kali ar shaka kaei kaba ki ki kwah ka long ban don ka jingpynbeit ryntih noh khnang ba kan nym don ka jingpynwit bad ka jingshah dain kuna.
