Shillong, Jymmang 26; Ka Hynñiewtrep Youths’ Council (HYC), lyngba ka Sports Cell (CEC) jong ka, ka la phah ia ki jingujor sha Director General of Police (DGP), Meghalaya, bad sha ka Board of Control for Cricket in India (BCCI).
ka seng kaba kyrpad ia ka tohkit bad shim kam mardor halor ki jingkynnoh shah leh khlemakor ki Nongialehkai Kriket kynthei jong ka Jylla bad ruh halor ka bynta ba la kynnoh ia katto katne ki nongkitkam jong ka Meghalaya Cricket Association (MCA).
Ka Seng ka pynpaw ba watla kane ka kam ka la poi sha ka miej jong ka State Women Commission, hynrei namar ka jingkhia jong kine ki jingkynnoh pyrshah ia kiba don ha ka bor, namar kata la dawa ia ka jingshim kam mardor, kaba hok bad kaba laitluid na ka liang ki bor ka ain bad ki bor ba dei peit ha ka kam Kriket ha Ri India.
Ha ka jingujor sha u DGP, ka Seng ka la dawa ia ka jingtohkit ba mardor , ka jingregister ia ka FIR lada donkam katkum ka aiñ, ka jingshngain bad ka jingïada ia ki nongujor bad ki sakhi, bad ka jingpynshitom katkum ka aiñ ia baroh kiba lap ba ki donkti ha kane ka kam beaiñ.
Ha ka jingthoh sha ka BCCI, ka Seng ka la kyrpad ia ka BCCI ba kan sdang ia ka jingtohkit kaba laitluid, peit bniah ia ka jingbakla jong ki Nongkitkam ki ba don bynta ha ka MCA, pynthikna ia ka jingïada ia ki nongialehkai kiba shah ktah, bad pynkhlain ia ki rukom pyniaid bad jingpynbeit ia ki ujor hapoh ki bor ba dei peit ia ka Kriket ha ka Jylla.
Ka Seng ka la ban jur ba ka jingshngain, ka burom ka ijot bad ka bha ka miat jong ki Thei-Ialehkai kam lah ban shah pynkhein, bad ka la ong ruh ba kano kano ka jingpyrshang ban tap eitmiaw ia ki jingujor lane ban iada ia kiba briew ba don ha ka bor, kan pyntlot ia ka jingshaniah u Paidbah bad pynrit mynsiem ruh ia kiba shah ktah ban wad ia ka jingbishar kaba hok.
Ka HYC ka la kyrpad ia ki bor ba dei khmih ia kane ka kam, ba kidei ban leh mardor, da ka jingkhuid bad ka jingbishar hok khnang ban pynioh ia ka bishar kaba him bad ban iada ia ka jinglong khuid jong ki tnat treikam kiba peit ia ki kam ialehkai ha ka Jylla hi baroh kawei.
