New Delhi, Jymmang 12: Ka India ka la iashim bynta ha ka bynta kaba 19 jong ka United Nations Forum on Forests (UNFF)ia kaba la pynlong ha ka UN Headquarters ha New York naduh ka 6 haduh 10 tarik u Jymmang 2024.
Ha kane ka jingialang, ka India ka la pyni ia ki sienjam jong ka ri na ka bynta ka jingiada ia ki khlaw ki btap bad ruh ki rukom pyniaid ia ki khlaw ha ka rukom kaba iaineh kiba la wanrah ia ka jingiar ki jaka khlaw ha kine ki khatsan snem ba la dep.
Ha baroh kawei ka pyrthei, ka India ka don ha ka kyrdan kaba lai ha kaba iadei bad ka jingkiew ka jingiar jong ki jaka khlaw man u snem, naduh u 2010 bad 2020.
Ka India ka la ong ba ka niewkor bha ia ka jingiada ia ka biodiversity bad ki mradkhlaw ha kaba ka la pyniar ia ka rynsan jong ki jaka ba la ai jingiada sha palat shi hajar tylli ki jaka ba kyrpang na ka bynta ki mradkhlaw, ki national park, ki jaka kyrpang na ka bynta ki khla.
Ki jaka kyrpang na ka bynta ki syntiew ki skut ki dieng ki sait bad kiwei kiwei ki jaka sah jong ki mradkhlaw. Ki jingrakhe ba dang shen ia ka jingdap 50 snem ka Project Tiger bad 30 snem jong ka Project Elephant ki pyni ia ka jingieng skhem jong ka India ban iada ia ki jaitmrad bapher bapher bad ka jingiada ia ki jaka sah jong ki.
Ka India ka la kdew ruh sha ka jingsdangjong ka Big Cat Alliance, kaba long sa kawei ka sienjam ba kongsan ban iada bad pynneh ia ki hynniewjait ki khla ha kylleng ka pyrthei lyngba ka jingiatrei lang hapdeng ki ri.
Ka India ka la kdew ruh sha ka jingsdang ia ka ‘Green Credit Program’ ia kaba la saindur ban ai jingmyntoi ia ki kynhun ba kin thung dieng bad khyllie im ia ki jaka khlaw ba la julor, bad kaba thmu ban pynkhlain shuh shuh ia ki sienjam ban tehlakam ia ka jingkylla jong ka suinbneng.
Ha shuwa kine baroh, ha u Risaw 2023, ka India ka la pynlong ia ka Country Led Initiative hapoh ka UNFF ha Dehradun, ha kaba la wan iashim bynta ki nongmihkhmat na 40 tylli ki ri bad 20 tylli ki kynhun na ki ri bapher bapher bad ha kane, la pynlong ia ki jingiamir jingmut halor ka jingtehlakam ia ka jingpluhkhlaw bad ka jingai jingithuh ia ki jaka khlaw. Ki jingai jingmut na kane ka sienjam ki dei kiba la rah shakhmat da ka India ha ka UNFF 19.
Ka Tnat ka la pynlong ruh ia ka prokram ‘Principles and Strategies for Landscape Integrated Fire Management through Collaborative Governance’ ha ka jingiatreilang bad ka Agency for Integrated Rural Fire Management, Portugal, ka Korea Forest Service bad ka International Tropical Timber Organization (ITTO) ha ka UNFF 19 ha New York.
Ka UNFF 19 ka la poi sha kaba kut ha ka jingiakut jingmut ban shim ia ki sienjam ba mardor ban pynsangeh ia ka jingjah bad ka jingjulor ki jaka khlaw bad ruh ban tehlakam ia ka jingjulor ka khyndew, ba kynthup ia ka jingpyntreikam ia ka United Nations Strategic Plan for Forests bad ka jingpynurlong ia ki thong Global Forest Goal.
Ia ka kynhun na India la ialam da uJitendra Kumar, Director General of Forests bad Special Secretary, ka Tnat Environment, Forest and Climate Change jong ka Sorkar India.
