Shillong, Kyllalyngkot 10: Ka sorkar pdeng kala buh ia ka thang ba ia ka jingpang Tuberculosis dei ban pynduh jait na kane ka Ri India ha u snem 2025, ban pynpoi sha ka thong ka ophis jong u District TB Ophisar ka East Garo Hills la sam da ka jingbam ba teimet sha ki nongpang.
Ka skhim Pradhan Mantri TB Mukt Bharat Abhiyaan ka dei ka skhim kaba thymmai ia kaba la plie paidbah da ka President jong ka Ri India ha ka 9th Nailur 2022, ha kaba ki riew shimet ki seng sain pyrthei, ki seng trei mon sngewbha, ki kompeni ruh kila ban ia donbynta lang da kaba kyrshan ban iarap ia kiba pang hapdeng 6 bnaihaduh lai snem kane ka long ban pynlong ia ki paidbah ban ia kti lang ban rat jynduh ia kane ka jingpang.
Ia kane ka jignsam jingbam ha Williamnagar mynta ka sngi la ioh ia ka jingkren na kaMecyah Momin, DRTB Coordinator, Williamnagar District TB Centre. Ia ka jingbatai kaba bniah la ai da ka Dr. S.R Marak kaba dei ka Senior Medical & Health Officer ba dei peit ia kane ka jingpang.
Ha ka jingkren u Dr. C E N Sangma Medical Superintendent ka Civil Hospital Williamnagar East Garo Hills, la pynshai ba kane ka jingpang ka dei kaba lah ban pynkoit bad kan shim por la kumno kumno 6 bnai da dih tista ia ki dawai kumba la bthah da ki nongsumar.
Ha kane ka sngi u MLA jong kane ka jaka u Marcuise N Marak, u la don lang ha kaba u la ai khublei kyrpang ia ki nongtrei ka tnad ka koit ka khiah kiba la aiti ia lade ban trei ban sumar ia kiba pang ba shitom bad u la ong ba u kloi ban kyrshan lem ia ka ophis ban iarap da ki bam, ha kane ka sngi la ai khublei ia ka Nikshay Mitra bala ai ka jingkyrshan ia ka hospital ba 50 jignthiah da ki jingbam ba kala ai.
Haduh mynta ka Nikshay Mitra kala kyrshan ia ki 82 ngut kiba shitom da kaba iarap ban ai jingbam, kiwei kiba la wan sha khmat ban ai bam ki long u, Abraham T. Sangma, Superintendent ki pulit, u B K Marak, Housing Officer, u Hasmuddin Ahmed, Doctors Association bad Nurse Association ka Civil Hospital, Williamnagar, ki nogntrei ka TB Hospital.
Na ka jingkhein kaba don ha East Garo Hills District ki don 150 ngut kiba shitom TB, na ka liang jong ka Nikshay Mitras kala kyntu ia ki paidbah ban wan sha khmat ban iarap ia kiba don ia kane ka jingpang, ban iarap ki lah ban phah sha kane ka https://reports.nikshay.in/FormIO/DonorRegistration phah da ka mail sha ka dtomgegh@rntcp.org lane ki lah ban phone sha kine ki number District TB Officer 8014360396/ DPC 8837409982
