Shillong, Lber 27: Ban kham pynkhlain ia ka seng ka Confederation jong ka Ri Bhoi People (CORP) ha ka jingialang kaba long myntya ka taiew ha ka sngi Ba-ar ha Patharkhmah ka la ioh ban jied thymmai ia ki nongkitkam kynthup ia ka Western Zone-Jirang Konstitwensi bad ka Patharkhmah Circle na bynta ban pynkhlain ia ka jingtreikam ka seng ha ka thain Ri Bhoi sepngi bad ka Jirang Constitwency hi baroh kawei.
Ha katei ka jingialang la ioh ka jingkren na ki nongialam ka seng kynthup u Bah G.S Hat Publicity Secretary sengkmie bad u Bah Bandary Ryntathiang, Working President sengkmie kiba la pynshai ia ki mat treikam ka seng ryngkat ka jingdonlang ki riew rangbah bad ki dkhot ka seng na ki Unit bad Circle bapher bapher.
Kaba sngewtynnad ka long hadien ba la ioh ka jingiakren ban iaphylliew ia ki kam na bynta ka imlang ka sahlang bad ka pynroi ka par jong ka thain Ri Bhoi sepngi, ka seng ka la ioh ruh ban jied thymmai ia ki nongkitkam kynthup ia u President Western Zone, Bah Lumkur Lapang, Secretary Bah Wanker Talang lem bad kiwei ki dkhot, katba na bynta ka Patharkhmah Circle la jied bad pynshkem ia u Bah Wanhun Sangkli kum President bad u Bah HD Paswet kum u Secretary lem bad kiwei ki dhkot ka Executive Committee.
Ia kitei ki nongkitkam la pynshkem bad pynsmai da u Bah Bandary Ryntathiang, Working President sengkmie ha ryngkat ka jingkyntu kynpham ba kin shimkhia ban trei ia ka kam ba la bynshet na bynta ka imlang ka sahlang bad ka roi ka par jong ka thain bad ka Ri Bhoi hi baroh kawei.(SP News)
