Shillong, Iaiong 28: Ka seng samla pule ka Khasi Students Union (KSU) Jaiaw Circle ryngkat bad ka Khasi Jaintia Presbyterian Synod Sepngi Urban Mission mynta ka sngi kila pynlong ia ka jingiaid paidbah ban pynsngewthuh ia ka jingma kaba mih na ka jingdih drugs.
U SP City u Bah Vivek Syiem u ba dei peit ia ka tnad Anti-Narcotic Cell jong kane ka nongbah Shillong, ha ka jingkren ka jong u sha ki samla kiba la poi sha ka jingialang ha Madan Student u la ong ba ka jingkynrei jong u Drugs kala long ha baroh kawei ka sor Shillong bad kiba pyndon kam ia u ruh kila dang bun.
La ong ruh ba ha ki khyndait snem kiba la leit kiba pyndon kam ia u drugs dei tang kiba la samla hynrei mynta kaba sngewsih ka long ba wat ki khynnah 12 snem ruh kila ngop ha kane ka jingdih drugs.
La ong ba kine ki nongdie drugs ki song ha ki song kiba rit hynrei ka dor ka long kaba rem ka poi haduh T.8000/- ban thied kam dei kaba suk, kine ki nongdih drugs haba kim ioh pisa ki sdang sa ka tuh bad ka lute.
La ong ba ha Shillong palat ia ka 1000 tylli ki case la register bad ki pulit bad 50% na kine ki case ki don ka jingiadei bad ki kam dih drugs. Ia kane ka jingiaid paidbah la sdang na iing dorbar Jaiaw Lum Pyllon bad la pynkut ha madan student ha kaba bun ki khynnah skul kila wan ban ia shim bynta ha kane ka jingiaid paidbah.
