Shillong, Iaiong 08: Kum ka jingpynpaw pyrshah ia ka jingbym lah ban leh ei ei ka sorkar ban khanglad ia ka jingkhaii masi tuh sha ka Ri Bangladesh, ka seng Khasi Jaintia Butcher’s Welfare Association (KJBWA) kala pynlong ia ka jingiaid paidbah na Motphran sha Additional secretariat da kaba rah ia ki placard ryngkat bad ki.
Ka KJBWA, kala pynkhreh ruh ia ka dorkhas ban ai sha ka sorkar, ha kane ka dorbar na ka liang jong ka seng kala ai ka jingiaroh ia ka tnad sorkar kaba dei peit ia ki mrad ba kala lah ban da jurip ia ki masi kiba rung sha kane ka jylla ba kin long kiba bit ba biang ban bam doh, ha ka juh ka por ka buh ka jingkyrpad ha ka sorkar ba kan buh ia ka khyrdop ban peit ia ka jingrung jong ki masi sha kane ka jylla.
U Vice President jong ka seng u Bah Warlarpih, u la ong ba kane ka jingiaid paidbah jong ki mynta ka sngi ka long ban pynpaw pyrshah ia ka jingbym lah ban leh ei ei ka sorkar ban khanglad ia ka jingshallan tuh ia ki masi sha Bangladesh bad kane kala wanrah ia ka jingkiew dor jong ka doh masi ha kaba ki nongthied ki hap ban siew ia ka dor kaba rem.
Halor ka jingkren jong u Dr Mukul Sangma myntri rangbah ka jylla ha kaba ia dei bad kane ka kam khaii masi tuh sha Bangladesh ban shu shaniah ha ki shipai BSF, ka seng ka pynrem ia kane namar ka sorkar jylla ruh ka don la ka jong ka bynta ban leh ban khanglad ia kane ka jingkhaii masi tuh. Kumba ka long mynta bun ki masi kiba khlem pyndeng tak ruh ki dang ioh ban rung.
Kiba la ia poi ban ia shim bynta ha kane ka jingiaid paidbah mynta ka sngi ban pyrshah ia kane ka jingshallan tuh ia ki masi sha Bangladesh kiba bun dei kiba shong die doh ha Iewduh bad kila don ruh kiba ia don na ki shnong nongkyrdong. Ka jingiaid paidbah kala iaid beit ha ka jingsynran lang jong ki pulit.
