Shillong, Nailar 31: Ka seng ki samla pule jong ka thain shatei lam mih ngi jong ka Ri India, ka North East Students’ Organisation (NESO) ka pynrem jur ia ka jingshah thambor jong ki briew ha ka jylla Tripura kiba ia don bynta ha kajingiaid paidbah haka 23 tarik mynta u bnai.
Naka liang jong kane ka seng ka sngewsih jur ba ban iohi ba ki paidbah kiba dang ia shim bynta ha kane ka jingiaid kaba jai jai kin shah thombor ha ki briew kiba ymlah ban tip, ha kaba ka sorkar jylla kam shym la lah ban ai jingiada ia ki briew kiba pynlong ia ka jingiaid paidbah kaba jai jai.
Ha ka khubor kaba la pynlait da u Chairman jong ka NESO u Bah Samuel Jyrwa u la ong ba, “ Ngi pynrem jur ia kum kane ka jingjia bad ki dawa ba dei ban thung ia ka jingtohkit da ki Magistrate, ban siew bailut ksan ruh sha kine ki briew kiba la mynsaw”.
Haba ia dei bad kane ban pynpaw ia ka jingpyrshah bad ban pynrem ia kane ka jingjia ka NESO bad ka seng Twipra Students’ Fedreration (TSF), Gauhati Unit,kin pylong ia ka jingiakhih ha Gauhati ha ka 2 tarik Nailar ban pynpaw ia ka dak jong ka jingiatylli jong ki ba ki briew jong ka Twipra.
Ha ka juh ka por na ka liang jong u Chairman ka NESO u ong ba kum rit paid jong kane ka dong shatei lam mih ngi jong ka Ri India ki don ryngkat bad ki briew jong ka Twipra ha ka jingialeh ka jong ki ban dawa ia la ka jong ka hok ka jong ki.
