Shillong, Lber 17: U symbut myntri rangbah ka jylla u bah Prestone Tynsong haba jubab ia ka jingkylli u bah Balajied Kupar Synrem, la iathuh ba ka jingpynkhren ban shna ia ka jingkieng ha wah Umiam ha Shella na ka Engineering Procurement Construction ka dang iaid sha khmat lyngba ka World Bank.
Haba jubab ia ki jingkylli bynrap u bah Prestone la ong ba namar bym ioh jaka ban shna ia ka jingkieng la hap ban kynriah noh kham sharum na ka jaka kaba la buh mut ban shna ia ka jingdieng, kumta ban ong katno ka jinglut ym pat lah ban ong.
Katkum ka jingpynkhreh kaba la dep phah pynshuw sha ka World Bank ka long T.20.49 klur, namar kane ka jingkynriah ia ka jaka ia mynta ym pat lah ban ong, ha dien bala ioh ia ka jingmynjur na ka World Bank ynsa pynkhreh ia ka jinglut jingsep.
Haba jubab ia ka jingkylli bynrap jong u nongialam ka liang pyrshah bah Prestone la ong ba ka jylla Meghalaya kan ioh T.800 klur na ka World Bank bad ki skhim kiba la pyniaid sha khmat ki long 13 tylli bad 8 tylli kiba dang ap ia ka jingmynjur ban kot sha katei ka jingmang pisa, ia kane ka pisa dei ban pyndon naduh u snem 2021 haduh ka 2026.
