Nongpoh Jymmang 29: U Deputy Commissioner jong ka Ri Bhoi District u C P Gotmare mynta ka sngi u la lum ia ka jingialang jong ki riew rangbah jong ka thian Ri Bhoi khamtam eh ia kiba na Nongpoh na ka bynta ban wad kilad ki lynti kumno ban wanrah ia ka jingshong suk shong sian hapoh jong ka District baroh kawei.
Ha kane ka jingiakynduh lang na ka liang jong u DC u ba la pyniaid ia kane ka jingialang, la batai ia kaei kaba la jia ha ka 27 tarik mynta u bnai bad u la kyntu ia ki riew rangbah ba kin ai ka jingiatreilang ban wanrah ia ka jingsuk jingsain hapoh jong ka District. Ha ka juh ka por u la ong ba kin sngewbha ban ai jingmut kumno ban wanrah ia ka jingshong suk shong sain khamtam eh na ka bynta ban rakhe ia ka jubilee rupa jong ka District ha kine ki sngi.
Na ka liang jong u SP jong ka Ri Bhoi District u Ramesh Sngi u la ong ba ka ain kan sa leh ia ka jong ka kamram, ba ha ka juh ka por u la ong ruh ba to kin ia wad kilad ki lynti ban wanrah ia ka jingshong suk shong shngian ba ki paidbah kin nym don kano kano ka jingsngewsyier.
Ha ka jingkren jong ka kong Rona Khyndeit MDC jong ka Nongpoh kala ong ba ka jong shong suk shong sain bad ka jingshngian jong ki paidbah ka long kaba ha khmat eh bad ka long kaba don kam ba baroh kin ia treilang na ka bynta ban wanrah ia ka jingsuk, kiba bun kiba la ia poi ha kane ka jingialang kila pynpaw ia ka juh ka jingsngew kumba la pynpaw da ka tei ka MDC.
Ha ka jingkren jong u bah CB Syiem Secretary jong ka synjuk ki rangbah shnong Nongpoh, u la pynpaw ba na ka liang jong ka synjuk ka pynrem jur ia ka jingjia ha Ronghana bad ha ka juh ka por u la pynpaw ia ka jingbym sngew tynnad ia ka jingleh jong ka District Administration ban shu pyndon kam da ka bor.
Na ka liang jong u Bah Syiem u la kylli ruh hato ka don kam ne em ia ka jingbit na ka KHADC, na ka liang jong u Deputy Commissioner u la pynshai kdar ba katkum ka ain shim khyndew jong ka u snem 1894 ym don kam jingbit, hynrei katkum ka ka shim khyndew jong u snem 2013 don kam ban ioh jingbit, hynrei ia kine ki ar tylli ki ain ym lah ban pyniakhleh lang.
Na ka liang jong u Bah Plie Tyrsoh, Bah Bipul Thangkhiew president jong ka RBYF kila pynansgew ba ki kwah ba ka jingshong suk shong sain kan wan biang khnang ba ka jingrakhe ia ka jubilee rupa jong ka District kan long kaba iaid beit iaid ryntih. Ha ka juh ka por baroh ki riew rangbah kiba la poi sha kane ka jingialang ki ai ka jingkiyrshan ia ka District Administration ban wanrah ia ka jingshong suk.
Ia ka jingialang la pyniaid da u DC ha kaba la don long u SP, ki ADCs, ki AECs bad kiwei kiwei de ki riew rangbah ka thain Ri Bhoi ryngkat ki seng bhalang kum ka RBYF.
