Jowai, Nailar 17: Ka Khasi Student Union Umstain Unit, East Jaintia Hills District kum shi bynta ban wanrah iaka khuid ka suba ha shnong ha thaw mynhynnin ka sngi (14/08/2014) kala lah ban pyllong iaka jingpynkhuid iaki sawdong sawkun ka shnong Umstain naduh ki tyllong Umbam umdih, ki lynti ki syngkien, ki iingskul bad kiwei kiwei pat.
Ia kane ka jingpynkhuid ia katei ka shnong la ialam da U Samla Robi Suchiang uba dei u President ka KSU Umstain Unit, ha ryngkat ka jingiasynran lang u Samla Shkemlang Lapasam General Secretary ka KSU Umstain Unit, U Ma Victor Suchiang Rangbah Shnong ka Umstain, ki dkhot ka seng bad ki paidbah nongshong shnong ka shnong Umstain.
Haba ai jingkren haka jingialang shwa ban sdang iaka jingpynkhuid shnong, U samla Robi Suchiang ula kyntu iaki paidbah nongshong shnong ka shnong Umstain ban ia treilang naka bynta ban pyllong iaka shnong kaba khuid ba suba namar ka jinglehkhuid hi ka long kaba kordor haduh katta katta bad ka long ruh ka spah bah.
Utei u samla nongialam ka KSU hakatei ka Shnong ula kyntu ruh iaki paidbah ka shnong ban leh khuid ymtang ha pohing lajong ne ymtang ialade shimet hynrei dei ruh ban pynkhuid iaki rud ki kiar , ki lynti ki syngkien bad ki tyllong umbam kiba don sawdong ka shnong.
Utei u samla u la ong ruh ba ka jinglehkhuid iaki sawdong sawkun ka shnomg kamdei tang shisien shi snem hynrei kum ki nongshong shnong ngi dei ban shimkhia jan man la sngi dakaba leit bret iaki jakhlia kum ki nuit ki nier, ki jhur ki jhep , ki bitor pait bad kiwei kiwei de shaki jaka badei ban bret iaki hynrei ym pat ha surok ne ha lynti iaid kjat ki briew.
Khatduh na ka liang ka Seng ka ai khublei kyrpang iaki paid nongshong shnong kiba la iawan ban ia shim bynta bad mih ryntih baroh sha katei ka jing pynkhuid shnong kaba la pyllong daka Seng.(SP News)
