Shillong, Nailur 21: Ka tnad ka thew ka woh jong ka sorkar jylla kala buh ia ki ophis jong ka ha baroh ki district jong ka jylla da ka jingthmu ban peit ba ki nongdie bad ki nongthied kin nym shah leh tuh ha ka thew kawoh.
Haba ia dei bad kane na ka liang jong ka tnad ‘Legal Metrology’ jong ka sorkar jylla Meghalaya kajuh pynlong ia ki jingpynshai paidbah na ka por sha ka por bad ha ka juh ka por ka bthah ia ki paidbah ba lada ki don kano kano ka jingartatien iaka thew ka woh ki dei ban ujor sha kane ka tnad sorkar.
Kumba ka long mynta ki don bun jaid ki jingthew kaba ki nongkhaii ki thew ha ka ia die ia thied ha iew ha hat, kiba bun kiba ki paidbah ki iohi ka long ka tangrajur, lane ka pylla kaba ia tip paidbah, ka pond, ki jingthew kiba da ka mashin ia kaba la tip kum ka “electronic weighing machine” kine ki long kaba ki paidbah ki pyn don kam bha.
Na ka liang jong u Controller jong ka Legal Metrology u Bah I.W Ingty u la ong ba na ka liang jong ka department ka ithuh ia baroh ki jingthew kiba la ithuh hapoh jong ka ain, ka Legal Metrology Act 2009 kaba la thaw da ka sorkar pdeng ia kaba la pyntrei kam ha baroh kawei ka Ri India.
Na ka liang jong ka department ka juh leit ban jurip na ka por sha ka por ia ki dukan jong ki nongkhaii ban peit ba kan nym don kano kano ka jingthew duna bad ha ka juh ka pork i paidbah ruh ki lah ban ujor lada don ka jingsuba ba ka don ka jingleh tuh ha ka rukom thew.
