Shillong, Nailur 16: U myntri rangbah ka jylla u Conrad K. Sangma mynta ka sngi 16/Nailur/2026 u la buh maw nongrim ban shna ia ka iew ha Malki ha ka jinglut T.24.27 klur/- ha ka jingiadon lang ka MLA kane ka jaka ka Dr.Ampareen Lyngdoh.
Haba kren ha kane ka jingialang u myntri rangbah ka jylla u la ong ba kane ka dei kawei na ki skhim kaba ka sorkar kala mang pisa ban pynbha ia ki iew ki hat sawdong ka sor Shillong na ka jingmang pisa na ka sorkar jylla kaba la kot T.130 Klur/- bad na ka Smart City Project ka long T.100 Klur/-.
Ki iew kiba shna sawdong ka nongbah Shillong na ka jingbei tyngka kaba T.230 Klur/- kaba kynthup T.130 Klur/- na ka pla tyngka ka sorkar jylla bad T.100 klur/- na ka skhim Smart City Project.Ki iew kiba la shna mynta,na kane ka pisa T.38 klur/- ia ka iew Shillong ha Laitumkhrah, T.14 klur/- ka iew ha Laban, T.2 Klur/- ka iew ha Lumshyiap.
Ka jingpynbha ia ka iew Polo ka long T.30 Klur/- ka jingshna ia ki dukan na ka bynta ki nongdie madan ha Dhankheti, Barik, Brightwell, Motphran bad Polo kan kot sha ka T.6 Klur/- bad ka jingpynbha ia ka Iewduh T.14 Klur/-.
U myntri rangbah u la ong ba kane ka jingshna pynbha ia ki iew ki hat bad ban ai jaka kiba biang ia ki nongdie madan ka long shi bynta ban pynkhlain ia ka ioh ka kot jong ki paidbah da kaba plie lad plie lynti ba kin ioh shong dukan ha ka rukom kaba bit ba biang ha kane ka sngi u MP Rajya Sabha u James K. Sangma u la ia don lang.
