Shillong, Risaw 24: Ka jingjur jong u slap ha ka miet sngi thohding bad mynta ka step sngi saitjian kala wan rah ia ka jingshlei um ha ka wah Umiam bad kane kala khlong ha ka shnong Kalatek bad ki pynthor kba kila shah tyllep ha ka um.
Katkum ka jingiathuh jong ki trai shnong na katei ka thain la ong ba bun na ki pynthor kba kila ngam hapoh um bad kane ka long ka jingduh ia ki nongrep namar ba u kba u la ieh bad la dei arta sa ka por ot kba.
Bun na ki nongrep ka khappud bad ka Bangladesh kiba don ia ki pynthor kba kila pynpaw ia ka jingsngewsih namar ka long ka jingduh kaba khraw ha kaba ia ki pynthor kba la tyllep da ka um khamtam ha kane ka por ba ladei sa ka por ba kin ot noh ia u kpa.
Ki briew na katei ka thain kila iathuh shuh shuh ba na ka daw jong ka jingjur jong u slap ka Umiam kala kiew bha bad kala poi shaduh ka shnong Kalatek ha kaba bun ki iing kila don ha ka jingma na ka daw jong ka jingkhlong ka um.
Bun na ki iing kiba don hapoh jong ka shnong Kalatek kila shah khlong ka nongrim iing jong ki ha kane ka jingshlei um bad kane ka jingjia shlei um kala buh ia trai iing kiba la shah ktah ha kane ka jingshlei um ha ka jingsyier.
