Jowai, Jylliew 22: Ka JSU jowai Circle ryngkat bad ka JYF Jowai Circle ki lah leit ban khang naphang iaki Bank bad ki ophis company kiba plie haka sngi kynmaw burom ia u Thomas Jones u kpa jong ki dak ktien Khasi.
Ha kane ka sngi ki ar seng ki lah maham tyngeh iaki long heh jong ki bank ba ki dei ban burom iaka sngi kyrpang jong ka jaitbynriew hynñiewtrep khamtam ha kum kane ka sngi kynmaw burom ia u kpa jong ki dak ktien Khasi.
Ki arseng ki lah khang iaki Bank kiba don hapoh ka sor Jowai kiba lah plie ha kane ka sngi naduh ka State Bank of India – Jowai Branch, Ladthadlaboh Branch, Indian Overseas Bank- Jowai Branch, Apex Bank, ICICI Bank, HDFC Bank, Axis Bank, Meghalaya Rural Bank.
Ka Bank of India, North East Small Finance Bank, UCO Bank, Jowai Co-operative Urban Bank, IDBI Bank, Union Bank, Canara Bank, kamjuh da khang leh ia ki Financial Services kam ka Mahindra & Mahindra Finance, Cholamandalam Finance, IndusInd Bank.
Ka seng ka lah kyntu ia kino kino ki ophis treikam ka sorkar wat haduh Bank, ki ophis bei tyngka kidei ban burom iakane ka sngi kyrpang jong ka jaitbynriew, ki sngi kiba ka sorkar jylla kala pynbna kum ka shuti ban burom ia ki riew khraw.
