Shillong, Rymphang 28: Ka Hynniewtrep Youth Council Education Cell (CEC) mynta ka sngi ki la leit ban ia kynduh ia u myntri ba dei peit ia ka tnad Pule puthi u Rakkam A Sangma ban ia kren bad u halor ka jingduna ki kot pule ba thymmai jong ka Meghalaya Board Of School Education mynta u snem ha ki jaka die kot, ha ka ba ka la wanrah jingeh shibun ia ki kmie ki kpa, ki khynnah skul bad ia ki nonghikai ha kine ki sngi ba mynta.
Ka seng HYC ha ba ioh I ia kane ka jingeh jong ki Khynnah skul kam banse ba kan wan ban buh da ka jingthoh ha khmat jong u Myntri ka Tnad Pule Puthi jong ka Jylla U Rakkam A Sangma ban ioh ban pyntip sha u ha ka baiadei bad ka jingshem jingeh jong ki khynnah skul napoh ka jylla ban ioh ia ki kot pule jongki na ki jaka die kot.
Ha ba kren sha ki ladpathai khubor na ka liang u secretary jong ka HYC Education Cell u samla Enlang Sawian u la ong ba ka jingduna ki kot pule thymmai jong ki khynnah ki ba kynthup na duh ka English, Math bad ka Science ha Shillong bad ha kiwie kiwei pat ki District kimshym la ioh ia kine ki kot namar ba ki nongdie ki la batai ba kim don ia ka production.
U la ong ba hakane ka jingiakren bad u Myntri na ka liang u Rakkham Sangma u la pynpaw ba kine ki kot ki don ia ka production ka ba biang bad u la ai ruh ka jingkular sha ki dkhot ka seng HYC ba ha kine ki khyndiat sngi ka Education department kan sa lah ban pynbiang ia kine ki kot sha ki khynnah skul.
U bah Sawian u la ong ruh ba na ka liang u Myntri u la ioh ruh ban ia kren bad ki nongpynmih jong kine ki kot ba kidei ban pynbiang ha poh kine ki taiew ban wan.
U la ong ruh ba ha ka baiadei bad ka jingkiew dor ki kot pule na kaliang ka seng ka la ong ba kane kan ktah bha ia ki khynnah pule bad khamtam ia ki kmie ki kpa ha ka ba ka lah ban wan rah ia ka jingpep skul ba shipor jong ki khynnah ha ka jylla.
Ka HYC ka la buh ka jingkyrpad ia u Myntri ba u dei ban tuklar lem ia kane ka jingeh ba ki khynnah skul ki kynduh ha ka ba iadei bad ka jingduna ki kot skul ha ki jaka die kot ha ka ba ki khynnah ki la shem jingeh namar ba ki skul ki la sdang ban iaid shakhmat ha ka jingai jinghikai sha ki khynnah.
Ka seng ka la pynpaw ruh ba ka jingbym ioh ia ki kot pule ha ka por ka ba biang ka la pynshem jingeh ia ki Nonghikai bad ia ki Khynnah skul ruh kumjuh bad kan wanruh ka jingduhnong ka ba khraw ha kaba kan wanrah ruh ia ka jinghiar ha ka pule puthi jongki khynnah ha ka jylla.
