Shillong, Jymmang 23: Namar ka jingbym lah ban leh ei ei ka Shillong Municipal Board, ka Shillong Cantonment Board kum juh ka Defence Estate Officer, ka seng Hynniewtrep Youth Council (HYC) mynta ka sngi kal leit ban pynpra ia ki jaka sah beain jong ki briew ha Lum Survey bad ban ong ba ki dei ban sah ha katei ka jaka.
Ha kane ka jinglet ban khynra na ka liang jong ka HYC kala phah mih ia ki briew kiba sah beain ha katei ka jaka bad bad kila pynpra ia ki iing lyntang kiba la shna ha katei ka jaka, bun na kiba sah ha katei ka jaka kila lum ia ki jain ki nep jong ki bad mih na kane ka jaka.
Ha kane ka sngi la iohi ba ki pulit jong ka jylla kila don lang ha kane ka jaka bad kane k jingdon jong ki ka long ban pynthikna ba kan nym mih kano kano ka jinghuri hura ha kane ka por ba ki dkhot ka HYC kid ang pynpra iaki iing ki sem, na ka liang ki pulit kila pyrshang ban ong ban nym leh kumne.
Ban kdew ba na ka liang jong ka HYC kala dep ban ai da ka jignthoh sha ka Shillong Municipal Board bad sha ka Shillong Cantonment Board ban weng ia kitei ki briew kiba la shah beain ha katei ka jaka hynrei haduh mynta ka sngi kim pat leh ei ei, dei halor kane ka nongrim ba ki sa leit ban pynpra ia ki iing beain ha katei ka jaka.
Ia kane ka jingleit ban pynpra ia kitei ki iing beain la ialam da u President seng kmie ka seng u Bah Roykupar Synrem, haba kren ha ki lat pathai khubor la ong ba ka seng kala lap mynta la shibnai ia ka jingshong beain kito ki briew kiba don ha pdeng 80 haduh 100 tylli ki long iing.
U Bah Roykupar la ong ba kum ka seng ki la leit ban ia kynduh ia ki bor sorkar , naduh u Symbut myntri rangbah, Deputy Commissioner, ban pynpaw ba ki don ki briew kiba shong beain ha katei ka jaka, ym tang katta hynrei ka pdeng jong ka jingshallan ia u drok ha Shillong dei na kane ka jaka.
Ki briew kiba don ha katei ka jaka ym tip na ei kiwan bad shaei ki leit bad ki leit katba mon, la kynnoh ba ki shallan ia u drok bad ki pynjot ia ki khun samla ka ri, u ADC bad u CEO jong ka Shillong Municipal Board kila iohi da kaba shai ha ka jingwan jurip ka jong ki bad ka seng HYC. Ki bor pulit ki tip ba ki nongshallan drok ki don ha katei ka jaka.
Bah Roykupar la ong ba lada ka sorkar ka shem ba don na leh beain ka rah ia ki JCB ban pynpra ia ki iing ne ki dukan, hynrei ka jingkylla u balei pat ia kine ka sorkar kam leh ei ei ha kaba ym tip na ei ki wan, haba ka sorkar kala tip mynta la shibnai bad ki jaka ba hap hapoh ka jingpeit ka Cantonment jylla ki nongdie drok, ka seng ka leh ia kaba dei ban leh hato ka sorkar kan leh ne em.
