Shillong, Naiwieng 15: Ka KSU EJHDU ha ka jingialang ba dang shen Executive Committee ka la pynpaw ia ka jingsngewdiaw namar ka jingbym shim khia ki bor ba dei peit ia ka surok NH-6, wat hadien ba ka seng ka la pynlong da ki jingiakhih bad kumjuh ki jingleit rung sha ki ophis sorkar la katno sien.
La pynsngew ruh shaduh u Deputy CM, bah Prestone Tynsong, sha ka NHAI PIU, Shillong bad kumjuh ha DC ophis la katno sien. Hooid ym lah ban len ba ha Khliehriat kaba dei ka HQ jong ka District la dep ban maramot kumta, ki paidbah ki la lait na u pum pum.
Hynrei haba phai sha thaiñ Narpuh kata naduh Mynkre shaduh Malidor ka long ka jingjynjar khait. Ka jinglong jingman ka leit ka wan ka nangjur nangjur ka jingsahkut kali bad ka surok ka la nangjur ar shah ka jingsniew.
Ka don hi ka jingmaramot, hynrei ithamula pat haba peit ia ka rukom leh tangdep bymiahap shano shano. Nalor kata ka jingsuki kaba palat ka jingtrei. Ym lah shuh ban batai da ka ktien haduh katno ka jingsohsat naduh ki nongshong dukan, ki nongleit nongwan.
Ki ïng ki sem la tap baroh da u pum pum, la rung shaduh khiew ja, ki khynnah skul ba iaid lynti na kane ka surok ban leit thoh exam, ym lah shuh ban batai. Ka aiom leh kmen Khristmas ki paid riewngeit Khristan jong une u bnai Nohprah, kumno kin leh kmen haba kat kane ka apot, kumno kin ialam ia ki khun ban iaid na surok sha ïng mane hapdeng u pum pum.
Kane ka dei ka kput kylliang ka sorkar ka ai ia u paidbah. Ka KSU ka shim ia ka rai ban ap haduh ban da kut une u bnai Naiwieng (November) 2023, kumba la pyllait ktien u DC EJHD lyngba ki lad pathai khubor ba yn sdang ka jingairong bsiang haba kut une u bnai. Lada ki bor ba dei peit kim leh, ka seng kan sa shim ia ka rai ba tyngeh.
