Shillong, Nohprah 26: Ka Seinkur Langstang, Suiam, Swer mynhynne ka sngi ka la pyllong da ka jingiaiaid paidbah haka shnong Rtiang West Jaintia Hills District kaba dei ka shnong trai jong ka Manti I Langstang , kum ka dak ban ban pynrem jur iaki nongleh dusmon kiba pyniap, bad lehbor iakatei ka khynnah skul kaba dei ruh ka khunswet.
Kane ka jingjia shah pyniap bad lehbor katei ka khynnah ka la jia haka 16 tarik mynta u bnai Nohprah haka shnong Sohkymphor East Jaintia Hills District.
Ha kane ka sngi la iadon lang ruh ki khynnah skul, ki seng longkmie, ki nongialam shnong, ki nongialam ja Seng Kur Langstang, Suiam, Swer, ki nonghikai, ka JSM, KSU Laskein Circle bad kiwei kiwei pat.
Ha kane ka jingiaid paidbah la don shibun ki jingthoh pynrem kiba la rah daki khynnah skul ki riewpaidbah bad ki dkhot ka KSU naka bynta ban pynrem jur iakito kiba donkti bad ruh ban dawa kem iaki.
Ha kane ka sngi naka liang ka KSU la ia donlang u Samla Balawan Suchiang President ka KSU Laskein Circle, Samla Javeline Shadap Manner Organising Secy KSU Laskein Circle, Samla Leningrad Tariang Organising Secy KSU Jaintia Hills District Unit, Ki Nongialam ka Jaintia Student Movement bad kiwei kiwei.
U samla Balawan haba ai jingkren u la ong ba ha Ri India ka kam batbor ka la kiew bha na uwei u snem sha uwei pat bad ka daw ka jingkiew ki kam batbor kadei namar ka jingbymdon ki aiñ kiba khlain ban pynshitom iaki nonglehbor iaki kynthei ki khynnah.
” ha u snem 2018 ka kam batbor hapoh ka ri India baroh kawei ka poi da palat 2 lak tam hynrei ha u snem 2019 pat ki kam batbor ki la poi kumba palat 4 lak tam, kane ka pyni ba katnang mih ki sngi nangjur ki kam batbor hapoh ka Ri India kat nang mih ki sngi” la ong u samla Balawan Suchiang, ” Na kata kadaw ngi donkam kyrkieh iaki ain kiba khlain kiban tehlakam iaka jingkiew ki kam batboh hapoh ka Ri baroh kawei” ula bynrap shuh shuh.
Hakane ka sngi la ioh ruh iaka jingkren na u Samla Leningrad Tariang, U Samla Shnalad Rymbai nongialam ka JSM , ki nonghikai bad kiwei kiwei.
