Shillong, Kyllalyngkot 26: U myntri rangbah ka jylla u Dr Mukul Sangma haba kren ha ka jingrakhe ia ka Republic Day kaba 68th mynta ka sngi ha Madan Polo, u la ong ba da ka jingmut kaba khuid ka sorkar ka kwah ban rat dyngkhong ia ka bamsap bad ban leh ia kane ka sorkar kala wan shibun ki ain kum ka Lokayukta ha kaba ka sorkar ka dang wad mynta iano ban thung ban long khlieh ia kane ka kam.
U mytnri rangbah ka jylla u la ong ba dei ha ka 26 tarik kum mynta ka sngi jong u snem 1950 ba ki paidbah jong ka Ri kila ai ha lade ia ka Riti Synshar bad la pynbna ba ia Ri India ka dei ka Ri Sovereign Democratic Republic.Ka Riti synshar jong ka Ri India kala ai ia ka riti synsahr paidbah ha kaba baroh ki niam kin ioh ia ka jingmane blei kaba laitluid, ki paidbah kin ioh ban trei lait luid bad baroh ki ialong kawei ym don ba ri ym don ba khraw. U kpa jong ka jaidbynriew u Mahatma Gandi u la ong u nongprad lynti bad ryngkat kiwei ki riew khraw jong ka Ri.
Ha kum kaneka sngi dei ban kynmaw burom ia ki nongialeh laitluid, jong ka Ri bad kum juh ki briew jong kane ka jylla kaba la pynmih ia u Tirot Sing, U Kiang nangbah bad u Pa Togan N Sangma bad kidon ruh kiwei kiwei kiba khlem da paw hynrei kila ialeh ban ia khun ban pynioh ia ka jinglaitluid.
Ka sorkar ha kine ki snem baroh kala ia leh katba lah ban leh ia kaei kaei na ka bynta ka rai ka par jong ka jylla da kaba wanrah ia kki ain kum ka Meghalaya Special Court Act, 2014; Meghalaya Lokayukta Act,2014; Meghalaya (Benami Transaction Prohibition) Act, 1980 kumba la pynkylla Act ha u snem 2016 da kane ka rukom yn sa lah ban ioh ia ka jingsynshar kaba bit ba biang. Haba phai ha ka liang ka shong suk shongsain mynta ka jylla kala kham biang lait noh ki kam tuh lute ha ki katto katne ki bynta.
Ban kham pynjan ia ka jingtrei kam jong ka sorkar bad ki paidbah ka sorkar kala shim ia ka rai ban plie noh sa hynriew tylli ki Block, saw tylli ki Civil Sub Division bad 18 tylli ki police station. Haba ia dei bad ka jingwan rung tuh jongki briew kiba na bar ka jylla kala pynkhreh ia ki lad ki lynti kumno iada na kane ka jingwan rungtuh.
Ha kane ka sngi u myntri rangbah u kdew ruh ia shibun ki kam kiba ka sorkar kala leh na ka bynta ban kyntiew ia ka ioh ka kot jong ki paidbah ha ki liang baroh da kaba pyntrei kam ia ki skhim sorkar kiba pher bapher ha baroh kawei ka jylla.
Ha kane ka sngi la pynburom ia ki 10 ngut ki pulit jong ka jylla kiba la ioh iaka Governor Police Award, la sam ruh ia ka khusnam sha ki nongioh iaka Meghalaya Day Award ha kane ka sngi bad kita ki long ia ka khusnam Tirot Sing Award ha kaba ia dei bad ka thoh ka tar la ai sha u Bah Sumar Sing Sawian, Pa Togan Sangma Award na ka bynta ki kam trei mon sngewbha la ai sha u Leander K.Marak bad ka khusnam U Kiang Nangbah Award la ai sha ka kong Dolyne Kharbhih kaba dei ha ki kam ialehkai.
