Shillong, Lber 06: Ka seng sain pythei ka AAP jong ka Meghalaya State Unit kala shim ia ka rai ban ai noh da ka PIL pyrshah ia ka MeCL namar ka jingpynkiew dor palat ia ka bai light ha kine ki bnai, la ong u Bah Anthony Lyngdoh Secretary jong ka seng ha kane ka jylla Meghalaya.
Na ka liang jong ka seng Ka Khasi Students Union ka pynrem ia ka jingleh thurmur ka MeCL ha kaba ia dei bad ka jing pynkiew dor kynsan haduh ar shah lai shah na kaba ju poi bill man u bnai sha ki thyliew ing jong ki briew.
Kane ka jingleh jong ka Board ka long ka bym lah ban pdiang na ka liang ka seng bad ka ktah ruh ia u paidbah.Kumta na ka liang ka KSU ngi dawa ba ka board kadei ban pynshai ha kaba iadei bad kane ka jing pynkiew bill light kynsan ha man la ki thylliew ing bad kumjuh ruh ngin thoh shithi sha u chairman bad secretary jong ka board halor kane ka jing pynkiew bill light kynsan.
Te,lada ka board kam lah ban pynshai halor ka jingpynkiew bill light kynsan ha kine ki khyndiat sngi,na ka liang ka seng ngin dawa na u paidbah ban nym siew bill light shuh sha ka board. Ong u Bah Auguster Jyrwa.General Secretary jong ka seng KSU.(SP News)
