Da kawei ka sur rai ka kynhun MDA ba kane ka sorkar kan neh haduh ba kut ki san snem

Shillong, Naiwieng 26: Ban weng ia ki jingia sngewthuh bakla halor ki jingkynnoh pyrshah ia ka sorkar Meghalaya Democratic Alliance (MDA) mynta ka miet ha ka jingialang da kawei ka sur kila rai ba kane ka sorkar kan neh haduh ba kut ki sang snem.

Haba kren ha ki lat pathai khubor ha dien ka jingialang ka ba la neh shikynta shiteng, u shongknor ka MDA u Conrad K Sangma u la iathuh ba kila ia kren hapoh ka MDA ia ki jingkynnoh pyrshah ia ka sorkar bad ha kane jingialang la shim ia ka rai bad ka jingkynnoh ki long ki bymdon nongrim, ki jingkynnoh dei tang ki katto katne ki briew na ka BJP.

U myntri rangbah u la iathuh ba u National President ka BJP u Dr M. Chuba Ao u la leit ban ia kynduh ia u ha iing sahi bad u la aisa ka jingkular ba ka BJP kan kyrshan ia ka sorkar MDA haduh ba kut ki sam snem.

Ha kane ka jingialang la ia kren ruh ha kaba iadei bad ka jingtest COVID-19, na ka liang jong u myntri rangbah u la pynshai ba dang don kam ban test ia ki briew ba rung sha ka jylla ban pynthikna ia ka jingshngian ki paidbah nongshong shnong ka jylla.

Ha kane ka jingialang kum ka kynhun MDA kila shim ia ka rai ba ka sorkar kan dang kham trei shitom shuh ban pynurlong ia ki jingangnud jong ki paidbah ha kine ki snem kiba dang sah. Ha kane ka jingialang la shim ia ka rai ba lada don kino kino ki jingeh dei ban ia kren shuwa hapoh ka MDA bad la ym lah ban ia pynbeit katta kala iaid da kumwei pat.

Ha kane ka jingialang baroh ki nongialam na ka kynhun MDA kila ia poi lang naduh ka NPP, UDP, PDF, HSPDP, NCP, KHNAM, ki MLA shimet bad na ka BJP la wan da baroh arngut ki MLA u bah AL Hek bad u  bah Sanbor Shullai.

What Next?

Recent Articles

Leave a Reply

Submit Comment

*