Shillong, Iaiong 30: Ka Lum Jingthang komiti, (LJK), ka Seng Khasi Kmie, ha ka 27 tarik mynta u bnai Iaiong, ka la shim ia ka sien jam ban iarap ban noh synniang da ki marbam kum u khaw, u dai bad ka 
mluh, sha ki longiing longsem ba don ha ka jingeh ha ki dong ne kyntoit kiba hap hapoh ka Elaka Laitlyngkot bad Raid Nongkynrih.
Ka jingsam ia kine ki marbam ka long ban iarap ia kito ki longiing ba duna ha ka ioh ka kot bad kamai kajih, kiba la mad ia ka jingeh namar ka jingkhang dam (lockdown) bala pynjari da ka sorkar kmie bad sorkar jylla, kum shibynta ban khanglad ia ka jingsaphriang jong ka khlam jingpang kaba la pur ha satlak ka sla pyrthei ka COVID-19 ne coronavirus.
Kine ki marbam kiba ka LJK ka la iarap ba kan noh synniang ka long sha ki 190 tylli ki longiing ba kynthup 1900kg u khaw, 190kg u dai bad 190kg ka mluh.
Ia ka jingsam ia kine ki marbam la aiti ha ki Dorbar Shnong ha ka jingiadonlang ki Rangbah Shnong bad ki President, Secretary jong ki tnad Seng Khasi, ki dong kiba hap hapoh ka Elaka Laitlyngkot ba kynthup ia ka Iewshyllong, Iewmawiong, Lumthangding, Laitmawroh bad Raid Nongkynrih ki long Nongthymmai bad Umthli.
Ha kane ka jingleit ban sam ia kine ki marbam, na ka liang ka LJK la lam khmat da u Rgh J.S.R. syiemlieh bad u Rgh Renold Rani uba dei u Treasurer ka komiti ryngkat ki dkhot ka komiti.
Kumban shu pynkynmaw ba na ka liang ka LJK ka la dep ruh ba kan noh synniang 50 hajar tyngka sha ka Chief Minister Relief Fund, ha ka 13 tarik u bnai Iaiong kum shibynta ka jingiasnoh kti bad ka sorkar jylla ban iakhun ia ka jingsdang ban wan poi jong kane ka jingpang ha kane ka jylla, khamtam leilei ha kane ka nongbah, kaba la shim wat ia ka jingim jong uwei na ki Doctor ba pawnam ka jylla.
