Shillong, Nohprah 20: Ka elekshon sha ka iing dorbar thawain ka jylla kan long ba u bnau Rymphang 2023, kaba sah ka long sa tang ka Election Commission jong ka Ri India kan pynbna ia ka tarik ban jied ia ki nongmih khmat sha ka Meghalaya Legislative Assembly.
Ki MLA kiba thmu ban ia khun ia ka elekshon na kiwei ki party ki hap ban resign shuwa ba kin thep ia ka nomination jong ki, ki MLA kiba hap ban resign kum ki dkhot ka iing dorbar thawain ka jylla namar kin ia khun noh na kiwei ki party kiba dang sah mynta ki dang don bun ngut.
U Bah Reniktone L Tongkhar bala jop na ka HSPDP, u bah Meralborn Syiem, bah Shilang Pale, bah Process T Sawkmie kiba la jop na ka party Congress ki hap ban hiar shuki shuwa ba kin pyniasoh sha ka party UDP.
U Bah Samlin Malngiang bala jop na ka pary HSPDP, bah Kimfa S Marbaniang bala jop na ka party Congress, bah Hamletson Dohling bad bah Jeson S Sawkmie kiba la jop na PDF, kine ruh ki hap ban hiar shuki shuwa ba kin leit ban pyniasoh sha ka pary NPP.
U Esmatur Mominin bala jop na ka NPP lada u kwah ban ia khun biang ia ka MLA u hap ban hiar shuki kum u MLA, u Adlebert Nongrum bala jop na ka KHNAM u ban leit sha ka party VPP, u Samuel M Sangma bala jop kum u kyrtong shimet bala pyniasoh sha ka BJP Associate member u hap ban hiar shuki.
